Prime Minister-in SCG, Sihhmui-a Indoor Cricket Academy hawng

Aizawl: July, 2023-a sak tan, Rs. vaibelchhe 18.25 man, Suaka Cricket Ground (SCG)-a Indoor Cricket Academy chu April 28, 2026 khan Prime Minister Narendra Modi-a’n Sikkim atangin a hawng.

  Sihhmuia Modi-a hawn tak hmun hi Cricket Association of Mizoram (CAM)-in India cricket pawl, Board of Control for Cricket in India (BCCI) atanga sum a hmuh hmanga a din a ni.

  Mizo pa chhiara chhawng hniha sang inah hian a chhawng hnuai (ground floor)-ah gymnasium, tui chenna, cafeteria, electrical room, IT room, hmeichhia leh mipa tan an bungrua an dah thatna locker room hrang, ice bath area, massage/recovery zone, inkhai chhuk-chhohna, staircase leh awm hahdamna hmun siam a ni.

HSSLC result chhuak-ah 87.67% pass

Aizawl : Mizoram Board School Education (MBSE) chuan April 29, 2026 chhun dar 12 khan Higher Secondary School Leaving Certificate (HSSLC) Examination 2026 result a tichhuak a, zirlai exam 12,243 zinga 10,734 an pass a, pass percentage chu 87.67 niin, nikum pass parcentage 81.10 aiin a sang zawk.

  HSSLC result chhuakah hian exam beitu 12, 243 an awm a, Arts Stream ah 8,714, Science Stream ah 2,770 leh Commerce Stream ah 759 awmin pass zatah mipa aiin hmeichhia an tam zawk a ni.

  Appear zatah mipa aiin hmeichhia 1033 in an tam zawk. Pass zat pawh hmeichhia 904 in an tam. 

Lehkha lem hmanga jail tang mi 15 chhuahna siamtu man

Aizawl : Lunglei district jail-a tâng mi 15 te chu Court lehkha lem (siam chawp) ni ngeia hriat hmangin Lunglei District Jail atanga chhuahtir an ni a. He thil thlengah hian District and Sessions Judge, Lunglei chuan Lunglei Police Station-ah FIR a thehlut a, April ni 29, 2026 ah khan ziah luh niin Police te chuan mawhphurtu nia hriat Jeremy Lalthangtura, District Jail, Lunglei-a tang mek lakah thubuai an ziak lut. 

  Jail atanga lehkha lem hmanga chhuak mi 15 atang hian mi 12 te chu an man let leh tawh a, mi pakhat chu thi tawhin, pahnih dang te chu state dang mi an nih thu an tarlang.

  Jeremy Lalthangtura hi Ukil lem chang thubuaia jail-a tang mek a nih thu Lunglei Police te chuan an sawi a. A jail tanpui te chu pawisa chawitirin ruahmanna a siampui tih an tarlang bawk.

AMC Mayor atan H. Lalremtluanga ruat

Aizawl : ZPM Party chuan April 28, 2026 khan Vaivakawn YMA Hall-ah AMC Election 2026-a hnehna an chan an lawm a, he hunah hian UD&PA Minister K. Sapdanga chuan AMC hotu turte puanna neiin H. Lalremtluanga W-6 chu Mayor tur atan a puang.

Mayor : H. Lalremtluanga W-VI

Deputy Mayor: R. Lalawmpuii W-XVI

Executive Corporator : Christina Roluahpuii Sailo W-VIII, Vanlalhruaia W-XIII, Vanlalfaka W-III leh K. Lalrodinga W-XVIII.

AMC Inthlanpui 2026 thlirletna nei

Aizawl: April 30, 2026 khan State Election Commissioner Dr. H. Lalthlangliana kaihhruaina hnuaiah Aizawl Municipal Corporation inthlanpui 2026 thlirletna hun chu a Office Chamber-ah neih a ni.

  SEC hian inthlanpui boruak muanawm tak hnuaia neih zawh a nih avang leh tluang taka result chhiarna hun neih a ni chu lawmawm a tih thu a sawi a, chumi atana MPF leh Political Party ten tha taka an thawhpui avanga lawmthu sawiin sawrkar hnathawk inthlan kaihhnawiha mawhphurhna nei zawng zawng ten an chanpual tha taka an hlen chu lawmthu a sawi 

  Model Code of Conduct chu he thlirletna hunah hian a tawp nghal thu a sawi a, AMC term intanna hi District magistrate hmaa oath-taking an lak ni atanga chhiar tur a nih thu a sawi bawk a ni.

HPC-D (LF) te ralthuam tunna hun CM hovin hmang

Aizawl : Hmar Peoples' Convention Democratic, Lalhmingthanga Sanate Faction te an ralthuamte tunga nunphung pangai zawh tura rawn kir te puala program sawrkarin a buatsaih chu Central Training Institute Parade Ground, Sesawng-ah Chief Minister Lalduhoma chuan a hmanpui.  

  He hunah hian Speaker Lalbiakzama, Home Minister K. Sapdanga leh Minister, MP (LS), Deputy Speaker, Adviser to CM leh MLA eng emaw zatin an tel bawk a ni.

  April ni 14, 2027 khan Mizoram sawrkar leh HPCD Lalhmingthanga Sanate Faction te hian Sakawrdai-ah inremna an ziak tawh a. Inremna angin an ralthuamte tunga an rawn kirna hun hi buatsaih a ni.

'Khuarel App' tlangzarh

Aizawl : Disaster Management & Rehabilitation Department leh Buannel Geo Solutions & Services te angkawp buatsaihin; Disaster Incident & Reporting Management System “Khuarel App” tlangzarhna chu April 29, 2026 khan hman a ni a, DM& R Department Minister Prof. Lalnilawma chuan a tlangzarh.

  'Khuarel App' hi Khuarel chhiatna a lo thlen thula mipui mimir, DM&R leh State & District Disaster Management Authority ( SDMA& DDMA) ten rang taka chanchin an inhrilhhriat theihna leh chhiatna lam thil record data felfai taka dah that theihna tur ni a, Mizoram chu India hmar chhak State te zinga hetiang App changkang tak nei hmasa ber a ni. 

Minister-in HSSLC result lawmawm a ti

Aizawl : School Education Minister Dr. Vanlalthlana chuan April 29, 2026 khan a office chamber-ah thuchah sawiin Mizoram Board of School Education buatsaih, Higher Secondary School Leaving Certificate Examination 2026 result chhuakah zirlai exam hmachhawn mi 12,243 atanga za zela 87.67 laiin hlawhtlinna an chang thei leh kum hmasa aia pass percentage zaa 6.57 laia a sang chu lawmawm a tih thu a sawi.

  Minister chuan a hun taka result tih chhuah a nih theih nana thawktu MBSE officer leh staff te, Higher secondary school zirtirtute, zirlaite leh nu leh pate, khawtlang hruaitute leh zirna kaihhnawiha thawktute zawng zawng chungah lawm thu a sawi a. Mizoram zirnain hma a sawn zel theih nana theih tawp chhuah chhunzawm zel turin zirna kaihhnawiha thawktute a sawm a. Nu leh pate chu an fate zirna ngaihsak deuh deuh tur leh Mizoram tana mi chhenfakawm chher chhuak tura theih tawp chhuah turin a sawm bawk a ni.

Union Minister of State lo zin

Aizawl : Union Minister of State for Home Affairs Bandi Sanjay Kumar chuan ni hnih cham turin April 27, 2026 khan Aizawl a lo thleng a, Lengpui Airport-ah Dr. Andrew H. Vanlaldika, Addl. Secretary, Home Department leh C. Lalremruati, Protocol Officer ten an lo hmuak a ni.

  Bandi Sanjay Kumar hian MINECO Conference Hall-ah Mizoram sawrkar department hotute nen an inkawm a ni. Union Minister of State Bandi chuan hmun hla tak atang in harsatna leh mamawhte ngaithla turin ka lo kal a, inthlahrung hauh lova Mizoram hmasawnna tur atana an vei leh ngaih pawimawhte sawi turin sawrkar official kalkhawmte a chah a ni.

  Union Minister Bandi hian video conferencing (VC) hmangin Siaha district-a sawrkar hotu pawimawhte a kawm a, VC hmang vek hian khawtlang aiawhte leh NGO aiawhte a kawm bawk a ni.

AMC 2026 Inthlanpui result puang 

Aizawl : Aizawl Municipal Corporation (AMC), 2026 Inthlanpui neih zawh taka vote tla te chu April 27, 2026 khan chhiar zawh a ni ta. Aizawl Municipal Corporation(AMC) chhungah hian Ward 19 awmin, Ward la tam ber, ZPM chuan Ward 17 an la a, MNF leh Congress party in Ward 1 ve ve an la bawk. 

  Vote hi ing dar 8:00 atang khan Aizawl Deputy Commissioner’s Office-ah chhiar tan a ni a. Counting Hall 4-ah AMC Ward 19-a vote tla te hi chhiar a ni. Vote hi tlai lam dar 2:00 vel khan chhiar zawh a ni.

  AMC inthlanpuiah hian vote 2,39,985 awmin, vote 1,50,638 a tla a, vote tlazat hi za zel-ah 62.77 a ni.