Dinsanga’n hneh takin QuiMing a awpbet

Aizawl : Dubai, UAE-a a inlan vawi khatnaah Laldinsanga’n hneh takin inhnek a thunun a, May 1, 2025 zan khan Cripto Fight Night-ah unanimous decision-a QuiMing Li a hneh rualin, pro boxing a khelh hnuhnun vawi liah ram dang boxer vek hmachhawnin a hneh vek.

   Dinsang’n a kut vei lamah na nei chungin Ramee Dream Hotel-ah mittlung takin round riat chhung a khel tluan a, thiamna leh theihna, tuanran leh kawng hrang hrangah Chinese boxer QuiMing awpbetin round tin a la vek a, 80-72 vekin judge pathumin an chaktir.

END in heroin leh a neitu a puh an man

Aizawl ; Excise and Narcotics department chuan April ni 30, 2025 (Nilaini) zing dar 8 bawr khan Zokhawthar Road, Champhai District-ah Heroin gram 451.100 (Hawng 40) leh a neitu nia puh – Rohlupuia (38) s/o Sangliana, Tuirial Airfield Veng-a khawsa nia inchhal an man.

   Heroin phurhna atana hman Ignis Car Registration No. MZ01 AD-3270 pawh hrensak nghal a ni. He case-a inhnamhnawih nia sawi pawh Court phalna lain man tuma beih mek a ni bawk. Heroin vanga man, Rohlupuia hi Section 21 (c) of The Narcotic Drugs & Psychotropic Substances Act, 1985 tlawhchhanin thubuai siamsak an ni.

MPSC Combined Competitive Examination result chhuak

Aizawl : Mizoram Public Service Commission (MPSC) chuan April 30 tlai khan Combined Competitive Examination result a tichhuak a, a pumpuiah Samuel Malsawmzuala s/o JH Laldingliana, Serchhip Tuikhuah Veng chu pakhatna a ni.

   Combined Competitive Examination-ah hian Mizoram Civil Service- ah mi 15, Mizoram Police Service-ah 8, Mizoram Finance & Accounts Service-ah 8 leh Mizoram Information Service-ah 3 an tling.

END-in heroin leh a neitu a puh an man

Aizawl : Excise and Narcotics department chuan April ni 30, 2025 (Nilaini) zing dar 8 bawr khan Zokhawthar Road, Champhai District-ah Heroin gram 451.100 (Hawng 40) leh a neitu nia puh – Rohlupuia (38) s/o Sangliana, Tuirial Airfield Veng-a khawsa nia inchhal an man.

   Heroin phurhna atana hman Ignis Car Registration No. MZ01 AD-3270 pawh hrensak nghal a ni. He case-a inhnamhnawih nia sawi pawh Court phalna lain man tuma beih mek a ni bawk. Heroin vanga man, Rohlupuia hi Section 21 ( c ) of The Narcotic Drugs & Psychotropic Substances Act, 1985 tlawhchhanin thubuai siamsak an ni.

Casual teacher ten lungawi lohna lantir

Aizawl : ZALEN April 30, 2025; Mizoram sawrkar hnuaia thawk casual teacher te chu April 30 atang khan school an kal lo.

   Casual teacher te hriattur an tarlan danin, Mizoram district casual teacher association OB te chuan Mizoram district hrang hranga casual teacher te dinhmun an ngaihtuah hnuah, an engagement order leh March thla hlawh lak loh avanga an thawhpui thenkhat an hna chhunzawm thei lo khawp a an awm chu pawi an tihpuiin an tawrhpui hle tih an tarlang.

MNF Thalai ten Kuhva ro Bag 200 phur ti ding

Aizawl : April 28, 2025 khan MNF Thalai, MNYF te chuan Edenthar-ah truck pakhat atangin Kuhva ro bag 200 phur chu nang chingin an din tir a, Bawngkawn Police Station-ah FIR an thehlut.

   Truck an man hi Assam registration AS-01 FC 7975 a ni a, a khalhtu hi Sultan Ahmed s/o Haminder Rehman, Borenga, Cachar district mi niin, Kuhva ro neitu hi Saphmingthangi d/o Vanlalpeka, Falkland, Aizawl nia chhal a ni thu MNYF atanga thudawnna chuan a sawi.

   MNF Thalaite chuan he an Kuhva ro man hi an MLA leh an president Robert Romawia Royte leh Tuirial bialtu MLA Laldawngliana hovin hma an la tih an sawi bawk.

HSLC 2025-ah zirlai 14,527 an pass

Aizawl : Mizoram Board of School Education (MBSE) chuan April 29, 2025 chhun dar 12 khan High School Leaving Certificate (HSLC) Examination 2025 result a tichhuak a, zirlai exam 18,946 zinga 14,527 an pass a, pass percentage 76.68 niin, nikum (73.37%) aiin an pass tha. HSLC 2024-ah hian a pumpuiah PC Lalthakimi d/o Darthuama, KD High School chu pakhatna a ni.

   HSLC 2025 top 10-ah mi 24 awmin, zirlai exam zingah mipa aiin hmeichhia an tam a, pass zingah pawh mipa aiin hmeichhia 707 in an tam zawk.

   Zirlai pass zawng zawng 14,527-te chu hmeichhia 7,617 leh mipa 6,910 an ni a, pass percentage-ah hmeichhia 75.63% niin, mipa 77.86% a ni.

   Distinction ah zirlai 1,343 pass in, first division-ah zirlai 3,763 an pass a, second division-ah 5,785 pass-in, third division-ah zirlai 3,636 an pass a, compartmental chance nei zirlai 64 an awm. Kumin hian zirlai 4,335 fail an awm.

Ni thum chhung ATL road dang

Aizawl : April 28, 2025 atang khan Mizo Zirlai Pawl Headquarters, Lunglei chuan ATL kawngpui an dang tan a, Nilaini thleng khan an dang.

   MZP Hqrs Lunglei chuan A-T-L Road siamna tur sum pawhpen nia an sawi chungchanga pek let an ngiatna avanga Pukpui daia kawng an dan chu an chhunzawm zel a, thawhlehni atangin Pukpui bakah Hrangchalkawn ah kawngpui hi dan chhunzawm an tum a ni.

   MZP Headquarters, Lunglei hian Sawrkar chuan tuna sum awm dah let emaw, CRRI te ruaia hmalakna thar neih ah te duh thlang turin a ti a. MZP Hqrs. Lunglei chuan an resolution angin, tuna sum awm pawh pen dahlet bakah, chumi in a daih lohna pawh ruahman belh tura written assurance pek an phut a ni.

Lungtla delhah chhungkhata mi pathum thi

Aizawl : April 28, 2025 chawhnu dar 3:45 vel khan Lengpui Airport panna kawng, tuikhawhthla bula lungtla chuan motor a delh a, mi pathum an thi a, he motor khalhtu chu dama lakchhuah a ni.

   Sairang Police Station atanga thudawnna in a sawi danin Pukpui tuikhawhthla bulah lung tlain motor pakhat a delh hi Hyundai i10 niin a registration hi MZ-04 0330 a ni a, motor-ah hian chhungkaw khat a mi mi 4 - mipa 2 leh hmeichhia 2 an chuang a. A khalhtu Lallawmzuala, S/o Lalrinliana, Falkland chu dama lak chhuah niin, damdawi in panpui nghal a ni a, midang - mipa 1 leh hmeichhe 2 te chuan nunna an chan a, thi te hi - Lalrinliana H/o Lungtiawii, Falkland ; Lungtiawii W/o Lalrinliana, Falkland leh Vanlalhruaii, D/o Lalrinliana, Falkland te an ni

   Lengpui khaw dai, Pukpui tuikhawhthla bula lung tla-in a delh chhungkua a mi 3 thi te chu April 29, 2025 khan vui an ni

MPSC din champha phak vawi 34-na lawm a ni

Aizawl: Mizoram Public service Commission a thawk tute chuan an kum 34 tlin lawmna hun May 1, 2025 khan Mc Cabe Hall, Aijal Club ah R. Lalramnghaka, Chairman, MPSC hovin an hmang.

   Mizoram Public service Commission hi India Danpui Article 315-na tlawhchhanin kum 1991 khan din a ni a. Kum 1991, May ni 1 khan Mizote zinga IAS ni thei hmasa 3-na, SR Vala chuan Sawrkar in a ruat angin MPSC Chairman hmasa ber ni turin a hna a zawm a. Hei hi vawiin thlengin MPSC din ni atan pawm chhoh a niin, kum 2025 hian kum 34 a tling ta a ni.

   Kum 1991 atanga vawiin thlengin MPSC hian Chairman 12 nei tawhin, Member ni tawh pawh mi 21 an awm a. Anni puibawmtu (Officer & Staff) zinga hotupa ber, Secretary pawh mi hrang hrang 11 lai he hun chhung hian awm tawhin, Tun dinhmunah hian MPSC chuan sanctioned post 86 a nei mek a ni.

Grassroots GSDP kalpui dan tifel

Aizawl : May 1, 2025 khanLalnghinglova Hmar, Minister of State, Sports & Youth Services Department office chamber-ah Samagra Shiksha Mizoram (SSM) leh Mizoram State Sports Council (MSSC) te chuan Grassroots Sports Development Programme (GSDP) kalpui dan tur inremna, Points of Agreement an ziak.

   Thawhdun dan tur inremna an ziahah hian Samagra Shiksha, Mizoram in cheng nuai 92 (Rs. 92,00,000) chu Mizoram State Sports Council hnenah a bul tanna kum khat atan an pe anga. Programme Coordinator (PC) leh thawktu pakhat dang MSSC hnenah hian an awm bawk ang. Hei bakah hian SSM chuan an bungraw mamawh angte an tum dawn bawk a ni.

   Mizoram State Sports Council lamin GSDP kalpui leh enkawl hi an buaipui dawn thung a, hemi tur hian Programme Coordinator leh SSM atanga thawktu dangte pawh an hnenah an awm dawn a ni. Trainer leh Assistant Trainer lak chungchangah SSM leh MSSC te hian thu an nei kawp ve ve ang.

CM leh NCST te inkawm

Aizawl : May 1, 2025 khan CM Conference Hall-ah Chief Minister Lalduhoma leh Mizoram tlawha lo zin mek National Commission for Scheduled Tribes (NCST) te an inkawm.

   Chief Minister hian, NCST chairman leh member ten kokim taka Mizoram an rawn tlawh avangin lawmthu a lo hrilh a. Commission member te hian Mizoram sawrkarin a lo dawnsawn danah lawmthu an sawi a. An ngaihpawimawh thil hrang hrang te Chief Minister hnenah hian thlenin, a tulna apiangah Mizoram sawrkar tanpui tura an inpeih thu an hrilh a. Delhi lama a zin leh hunah Commission tlawh ve ngei turin an sawm bawk.

CM leh AAI hotute inkawm

Aizawl : April 29,2025 khan Chief Minister Lalduhoma chuan a office-ah Airport Authority of India hotute Dr. Sharad Kumar, Member (Operations), M Raja Kishore, Regional Executive Director, NER leh an thawhpuite a kawm a. Lengpui Airport - Airport Authority of India kuta hlan chungchang a sawipui.

   Union Home Minister leh Chief Minister ten Lengpui Airport AAI kuta hlan chungchanga inbiakna thar neih an rel hnu hian Vanlaldina Fanai, Commissioner & Secretary to CM, GAD chu Delhi ah kalin Ministry of Civil Aviation Secretary leh AAI hotute nen meeting an zui nei nghal a. An meeting ruahmanna angin AAI Team te hian Mizoram an rawn tlawh ta a ni.

   AAI hotute hian Lengpui Airport tih changtlun nghal ngai zual nia an hriat te leh hma an lak zel dan tur te Chief Minister hnenah hian an tarlang a. Inkawmna hun tha tak a siamsak avangin lawmthu an hrilh a ni.

Uaiin siam chungchang sawihona- National symposium hmang

Aizawl: RB Mc Cabe Hall, Aijal Club-ah April 29, 2025 khan National Symposium and Consultative Workshop on production of Wine from Grapes and Fruits in Mizoram neih a ni a. Agriculture Minister PC Vanlalruata chuan he hun hi Khuallian niin a hmanpui.

   Technical session hman niin Dr KC Lalmalsawmzauva, Adviser to Chief Minister hovin “Building Sustainable Wine Industry in Mizoram Policy Initiatives and Recommendation” tih thupui hmanga neih a ni.

   Grape leh theirah thenkhat atanga Uaiin siam leh a kaihhnawih sumdawnna chungchang sawihona neih a ni a, Mizoram Science, Technology & Innovation Council (MISTIC), Directorate of Science & Technology leh All India Wine Production Association (AIWPA) tangkawpin a buatsaih a ni.

Thailand Health System kalphung zirchiang

Aizawl : April 28, 2025 atang khan Ni 5 chhung (28th April - 2nd May) awh Thailand Health System Learning visit chu Centura Life Convention Centre, Chaeng Watthana, Bangkok, Thailand-ah Health Minister Pi Lalrinpuii ho-in Mizoram Health Department Officials ten an nei.

   Khawvel ram 50 chuangin an lo zirchian tawh Thailand Health System hi Mizoram Health Officials te pawhin Kum 2019 khan zirchianna hmasa an lo nei tawh a, tunah hian Mipui Health care buaipuitute leh Health Department Officials hrang hrang ten chik zawkah zirchianna an nei a, Thailand experience leh Mipui Health care kalpui mek chungchang khaikhin a, a tul dan a zira an kaldan tha te lakchhawn theih beisei a he programme hi buatsaih a ni.

   Ni 5 chhung chu Thailand ram Health security te leh public health care system chungchang te an an zirchian dawn bakah Public Hospitals te, Primary Health Centres te a hmunah ah tlawh dawn bawk a ni.