Sports Minister-in Aizawl International Half Marathon 2026 atan Delhi-ah Press Conference ko

Aizawl : Minister of State, Sports & Youth Services Department Lalnghinglova Hmar chuan October 16, 2025 khan Vasant Vihar, New Delhi-a Mizoram House-ah Aizawl International Half Marathon (AIHM) 2026 chungchang khuhhawnna Press Conference a nei. 

  Sports Minister chuan AIHM 2026 chu February ni 14 ah neih tur a nih thu leh, mi 5000 vel tel tura beisei a nih thu a puang. Press Conference-ah hian national media te an kal tha hle. Sports Minister chuan AIHM 2026 prize pool ah cheng nuai 20 aia tlem lo dah a nih thu a tarlang a. AIHM 2026 a tel piah lamah, Mizoram tlawh tur hrim hrima zin turin India ram chhung leh pawn mipuite a sawm a ni.

  Delhi-a Press mite kal tlanga India ram mipui zawng zawng Half Marathon-a tela Mizoram tlawh pah tura sawmin, "Mizoram a awm tih pawh hre lote hnenah Mizoram tihlar kan duh a, tunah chuan Aizawl khawpui hi rel-a awlsam taka tlawh theih a nih tawh avangin state pawn mi thahnem zawk kan beisei a, chu chu New Delhi-a media hmaah hian kan puang duh a ni," a ti.

India Accelerator hotute meeting neihpui

Aizawl :Chief Minister Lalduhoma chuan October 16 khan a office-ah India Accelerator hotute chu meeting a neihpui a. Mizorama hma an lak theih dan ruahmanna an siam te a ngaihthlaksak.

  India Accelerator hian eizawnna lama hmalakna chi hrang hrangah mite a tanpui thin a, sum leh pai thlengin an ngaihtuah thei a ni. An hmalak theihna a tam avangin Mizorama kut an thlak theihna Department hrang hrang enkawltu Commissioner & Secretary te nen chawhnu lamah meeting an nei zui leh a, a taka kalpui theih chite chu bawhzui ni se, an ti.

Assam Rifles chhuahsan ram hman dan tur ngaihtuah

Aizawl : October 19, 2025 khan CM Conference Hall-ah Chief Minister hovin Assam Rifles chhuahsan ram hman dan tur ngaihtuahtu Advisory Committee on AR Land te chu a tum thumna atan an thukhawm a. Rawtna lut hrang hrangte an thlirho.

  Meeting-ah hian Master Plan siam that chu an thlirleh a. Ruahmanna thar ber ang chuan a ram zawng zawng zaa 39.33 hi mipui mamawh hmunhma sakna (built -up area) tur niin a dang zawng zaa 60.67 chu Green Area a ni ang.

  Committee hian Aizawl Square, Ring road ni nghal siam te, a ram chhuah lama bypass road, hmar lamah Saron atanga kal, Dak inpui bula chhuak sial te, mi 2000 lenna Convention Centre, a hnuai lam lirthei park-na lian tham tak nei sak te, kawngpui kam hmun hniha Mini Park siam te, two wheeler parking siam te, Heritage Court siam te, Bypass road kiang Venghlui lam hnaiha Multi Level Car Parking leh Open Air Theatre sak te a pawm a. Khawpui laili chawmtu turin Baja tlanga Tui dahkhawlna sak leh chhuah lam bypass road kianga 33 KV Sub Station dah an remti.

  Hmalakna tur pawimawh dangte leh dilna lut belhte pawh an sawiho a ni.

LushAIEdu PLS leh Success AI Career Guidance te tlangzarh.

Aizawl: Mizoram sawrkar leh LushAITech te tangkawpin an buatsaih, Mizoram Legislative Assembly Member-te tana Artificial Intelligence (AI) chungchang zir hona, Assembly Conference Hall-a October 16, atanga neih tanah Information & Communication Technology Minister Dr. Vanlalthlana chuan, zirlaite zirna kawnga pui theitu tur AI Application ‘LushAIEdu PLS’ leh hna zawng mekte tana pui theitu tur ‘Success AI Career Guidance’ te a tlangzarh.

  Success AI Carreer guidance leh LushAIEdu PLS te hi LushAITech kutchhuak niin ‘Success, AI Career Guidance’ hi web based a ni a, Mobile friendly a siam niin, sucess.lushaiedu.com atangin access theih a ni a; ‘LushAIEdu LPS’ hi app-based niin appstore atanga access tur a ni ang.

ICT Minister leh STPI Director-in Mizoram-a STPI din dan tur an sawi

Aizawl: Information & Communication Technology Minister Dr. Vanlalthlana leh Software Technology Parks of India (STPI) Director General Arvind Kumar te chu October 15 khan Minister pisa-ah inkawmin, changtlung leh chak zawka Mizorama STPI din a nih theih dan tur chungchang an sawidun a; Director General hi Ministry of Electronics and Information Technology Minister Ashwini Vaishnaw-a leh Mizoram ICT Minister te indawrna bawhzuia Mizorama rawn kal a ni.

  STPI hotute chuan ruahmanna lo siam turin Minister chu an chah a, rang taka hma lak an inhuam thu an sawi a ni. STPI Director General hi Guwahati Jurisdictional Director Vandana Srivastava-in a tawiawm a ni.

MLA te tana buatsaih AI training hawng

Aizawl: Mizoram Legislative Assembly Speaker Lalbiakzama chuan October 15 khan Assembly Conference Hall-ah Mizoram Legislative Assembly Member-te tana buatsaih, ni hnih chhung Artificial Intelligence (AI) chungchang zirna hun, ‘Empowering Mizoram Legislative Assembly with AI: Training on Artificial Intelligence for the Members of Mizoram Legislative Assembly’ chu a hawng.

  Hawnna hun hi Lalthangmawia, Additional Secretary, Mizoram Legislative Assembly chuan a kaihruai a. He training hi Speaker leh Chief Minister Lalduhoma-te hmalaknaa LushAITech nena tangkawpa buatsaih niin, October 15&16 khan thupui hrang hrang hmangin MLA-te chu LushAITech atanga resource person – Lawmna Kima, CEO; Lalremruat Kima, CFO; leh Robert Lalramhluna, VP-te chuan an zirtir a ni.

Health minister-in Union minister hrang hrang kawm

Aizawl : October ni 14, 2025 khan Health and Family Welfare Minister Pi Lalrinpuii leh Union Health Minister JP Nadda chu Delhi-ah an inkawm a. He an inkawmna hunah hian Lalrinpuii chuan Mizoram dinhmun hrilhin, ziak leh chhiar thiam tamna ber state leh state ralmuang ber kan ni chungin kan state-in Central Sawrkar zirna in lian - IIT te, IIM te kan neih ve loh thu a hrilh a. India ram State hrang hranga doctor zirna in tha leh damdawi in lian awmna AIIMS tal chu Mizorama din ve ngei turin a ngen a ni.

  Social Welfare Department changtu ni bawk Lalrinpuii chuan chuan October 14 vek hian Smt. Annpurna Devi, Union Minister, Women & Child Development Department chu a office-ah a hmu bawk a. Women & Child Department hmalakna tur hrang hrangte an sawi dun bakah Women Helpline sum release tlai chungchang pawh lo enzui a tum thu a sawi bawk.

  Tar pension buaipuitu Rural Development Department Minister a zinbo lai anih avangin RD Secretary - Shailendra Kumar Singh pawh Lalrinpuii chuan a hmu nghal a. Mizoramah kum upa, tar pension dawng thei, dawng si lo an tam thu hrilhin, Mizoram allotment chu tipung turin a ngen.

Chief Minister-in Hnahsin Kut hawng

Aizawl: Chief Minister Lalduhoma chuan October 14, 2025 khan Champhai Zotlang Mualah HNAHSIN KUT 2025 a hawng. Lt. Col. Clement Lalhmingthanga, MLA leh C. Lalremliana, KVI Board Chairman ten an tawiawm.

  Chief Minister chuan, "Hnahsin Kut ngaihtuah chhuak thiam kan nei te hi a vanneihthlak ka ti a. Ti hlawhtling tura Champhai mipuite tanrualna leh inpekna te hi a chhuanawm ka ti. Sorkar pawhin kan phurpui che u a, kan theih tawpin kan thawhpui che u tih in hriat kha," a ti. Mizoram mipuite chu Kut chhima Champhai tlawh turin a sawm bawk.

  Hnahsin Kut hi a tum hnihna niin Champhai Nature Conservancy, YMA Zotlang Branch, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC te tangkawpin Champhai mipui behchhana an buatsaih a ni.

Home Minister-in Rel station kalpui a nih dan enfiah

Aizawl: October 14, 2025 zing khan Home Minister K.Sapdanga, chuan Sairang Railway Station-a rel a lo luh hnu a State pawn atanga zin mi lo lutte dawnsawn an nih dan chu a hmun ah kalin a endik.

   He hunah hian Harjimal Meena, Deputy Chief Engineer, Construction, NF Railways chuan Sairang Railway Station-a zin mite dawnsawn an nih dan leh changtlung zawka thawmthat a nih theih nana hmachawp la awmte a tarlang a ni.

  Home Minister K.Sapdanga chuan rel hmanga inkalpawhna kawnga hmasawnna a thlen mek rualin zin mite dawl zo tur leh harsatna an neih lohna turin Sairang railway station pawh buatsaih zel a pawimawh thu a sawi a. State pawn atanga rel hmanga zin mi lo lut ten Inner Line Permit la chhuak tura rel station-a rei tak intlar ngai thin chu chinfel vat a tul thu sawiin, Mizoram mi leh sate leh ILP dil chawp ngai lote tan chhuahna hran buatsaih vat turin NF Railway thuneitute chu a hrilh.

Kawng chhiat vangin kawngpui dang

Aizawl : Mamit a tlawmngai pawl hrang hrang leh lirthei hmanga eizawngtu pawlte chuan PWD Engineer-in-Chief H. Zoramliana chuan mipui tana harsatna siam lo tur leh an hmalakna lo ngaichang turin ngen mah se, ruahmanna an lo siam lawk tawh angin, Mamit leh Aizawl inkar, Mamit leh Bairabi inkar leh Mamit leh Zawlnuam inkar kawng te siamthat phutin October 16, 2025 atang khan tiamchin awm lovin heng kawngte hi an dang..

  October 15 zan khan DC Conference Hall, Mamit-ah All NGO, Commercial Vehicle Owner Association te leh PWD thuneitute K. Laltlawmlova, District Bawrhsap hovin an thukhawm a. All NGO hruaitute leh Commercial Vehicle Owners Association hruaitute chuan Mamit khawpui leh District chhung khaw dang te'n harsatna an neih dan chipchiar taka sawiin, Mamit ah petrol leh diesel a awm loh thute, damlohna vanga hmunpui zawk pan ngaite tan harsatna nasa tak a thlen thu an tarlang a, tun dinhmunah blacktop mam han beisei theih a nih loh thute leh a theih ang ang a siam erawh an phut thu sawiin, tuna kan kawng dinhmun chu a chhiat em avangin, kawngpui dan avanga mipuite harsatna tawh tur pawh ngaipawimawh theilo a, dan chah tum an nih thu an sawi a ni.

END in heroin leh a neitu a puh mi pahnih man

Aizawl : Excise & Narcotics Department chuan October 14 zing khan Zote – Bulfek inkar kawngpui, Champhai District-ah heroin gram 31.300 (Hawng 2) leh a neitu nia puh mi pahnih - Zodinliana (42) s/o F. Laldinpuia (L) leh Lalmalsawmi (30) d/o Lalthlamuana, College Veng, Aizawl-a khawsa nia inchhal ve ve te an man.

  Hemi rual hian Heroin phurhna atana an hman, TATA Xenon Regn No MZ04 – 7843 pawh hrensak an ni.

  Heroin vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, October 14, 2025 khan District & Sessions Court, Champhai District-ah hruai an ni.