Kolasib PWD office Court order-in kalhsak

Aizawl : September 11, 2025 khan PWD, Kolasib Division Office, Tumpui venga awm chu Court order hmangin kalhsak an ni a, zangnadawmna pek tura court-in a tih an la pek fel loh vang a ni.

  Mizoram PWD te hian kum 2013/2014 bawr vel khan Serkhan to Bagha road kawngpui laihzauh hna thawkin mimal ram tam tak a tihchhiatsak a. Ram neitu ten zangna dawmna an hmuh tur zat pawh Sawrkar thu neitu ten an bithliah felsak tawh a ni.

  He thubuai hi Kolasib Court-ah hun engemaw chen a inchiah hnuin nikum December, 2024 khan Kolasib Fast Track Court chuan ram neitu ten zangna dawmna an dawn tur te chu PWD-in thla 2 chhunga pe fel turin order a lo tichhuak tawh a ni. Zangna dawmna tur sum hi a vaiin Rs. 3, 42,25444.09 a ni a, ram neitu te hi mi 62 niin Saiphai leh North Chaltlang khua mi te an ni.

Mibo thiin hmu

Aizawl: September 5, 2025 atanga chin hriat loha awm, Henry Lalnunsanga, Kulikawn, Aizawl chu September 10, 2025 chawhma dar 10:40 ah khan thia hmuh a ni. 

  Henry Lalnunsanga (35) S/o B. Kapliana, Kulikawn Veng, Aizawl chu September 5, 2025 zan khan Scooty MZ 01 - 8828 hmangin Serchhip panin a chhuak a, chin hriat lohin a awm zui a ni. 

  September 10, 2025 khan Chhiahtlang khawtlangin a zawn hna thawkin chawhma dar 10:40 velah khan a helmet an hmuhna atanga meter 500 vel leka hlaah a ruang hmuh a ni. 

Chanmari West-ah Heroin cheng nuai 35 man chuang man

Aizawl : Assam Rifles te chuan September 9, 2025 zan khan Chanmari West, Aizawl-ah Heroin No 4 thahnem tak an man.

  Chet an laknaah hian hnu chhuitu te hian an mi rinhlelh chu chhui zuiin hlawhtlinna an hmu a, Gram 51-a rit Heroin No 4 cheng nuai 35.7 man nia an chhut chu an man.

  Heng dan phal loh ruihlo an man leh a kawltute hi Excise and Narcotics Department, Aizawl kutah hmalak chhunzawm a nih theihna turin an hlan a ni.

Nula tui tla ruang hmu

Aizawl: September 7, 2025 tlaia Tuirial luia tla Zosangzuali (26) d/o Lalhmasawna ruang chu September 8, 2025 chawhma dar 12 rik hma deuh khan hmuh a ni.

  Zosangzuali hi a tlakna atanga km 5 vela hla, Tuirial Lungdingli thlang lawk lei atanga km 2 velah hmuh a ni.

  Zosangzuali hi September 7, 2025 kha a birthday a ni a, lawm turin an inbuatsaih a, cake pawh an order vek tawh a, chawhnu dar 1 vel khan inchiahdai turin a unaute leh a thiante nen an kal a, tuia an inchiah dai tur chu chesualin a tla ta nia thu dawn a ni.

PUC-ah Two Days National seminar hmang

Aizawl: Pachhunga University College, Mizo Department chuan ni hnih awh - ‘Tunhnai Mizo Thu leh Hla Dinhmun : Hawi Lam leh Sukthlek’ (Two Day National Seminar on Understanding Contemporary Mizo Literature : Issues and Concerns) chu September 11 &12, 2025 khan an buatsaih a. Khuallian, Mizoram University Registrar Prof. Lalnundanga chuan New Education Policy (NEP) hnuaiah Mizo tawng a pawimawh tulh tulh tur thu sawiin, “University signboard-ah pawh Mizo tawng telh zel turin UGC-in min nawr a ni,” a ti.

  Prof. Lalnundanga chuan Sorkar laipui, Ministry of Education-in tunhma chuan University signboard te chu Hindi leh English-a ziak turin min ti thin a, NEP 2020 a lo chhuah hnu hian mahni hnam bil tawng telh zel tawh tura hrilh kan ni a. Hindi, Mizo leh English-in signboard pawh siam zel a ngai tawh a ni tiin Mizo department leh Mizo tawng hi a pawimawh tulh tulh dawn a ni a ti bawk.

Chief Minister-in I&WR hmalakna sawipui

Aizawl : September 11, 2025 khan Chief Minister Lalduhoma chuan a office-ah Irrigation & Water Resources Minister PC Vanlalruata leh department officials te chu an hmalakna te a sawipui.

  Chief Minister chuan, kuthnathawka eizawng kan tam avangin kan loneituten tui tha an mamawh em em a. In department hian an tana hmalak theihna in nei ngah hle. Vawiina kan sawi hmalakna tur leh hmachhawpte pawh hi ram ro tling tur vek an ni a. Project tha tak tak nei phawt ila, kan bawhzui zel dawn a ni a ti.

MSS Junior Grade training te tlawh

Aizawl: Chief Minister Lalduhoma chuan September 10, 2025 khan Administrative Training Institute-a Mandatory Foundation Training kal mek Mizoram Secretariat Service mi 28 te chu CM Conference Hall-ah a kawm.

  Chief Minister chuan reilote an awm ve chhungin Service Rivalry a nasa tih an hmu thu leh hei hi hei hi tha a ti lo. Sawrkar mitah chuan hnathawktute zawng zawng hi in pawimawh vek a, duhsak bik an nei lo. Officers ten hnuaia thawkte welfare hi an ngaihthah fo thin niin an hria thu te an staff ten an chanvo an rawn dil a nih chuan an ngaihtuahsak thin tur a ni a ti a. Hmasawnna hna tam tak hi thumrawn (convergence) a kalpui a nih avangin department hrang hrangte thawhhona tha an mamawh hle tiin MSS training mekte hi a chah a.

SIR chungchang training-ah CEO Mizoram tel

Aizawl: Election Commission of India chuan 10.09.2025 khan State leh UT zawng zawnga Chief Electoral Officer-te Indian International Institute of Democracy and Election Management (IIIDEM), New Delhi-ah conference a neihpui. Dr. Lalrozama, Chief Electoral Officer, Mizoram pawh conference-ah hian telin, Ethel Rothangpuii, Joint Chief Electoral Officer, Mizoram-in a tawiawm a ni.

  Conference-ah hian ram puma Special Intensive Revision of Electoral Roll neih tur atana inbuatsaihna kalpui mek dan sawi ho a ni a. Special Intensive Revision of Electoral Roll hi Bihar state-ah neih mek niin State leh UT dang zawngah pawh neih thuai beisei a ni.

  Tun dinhmunah Mizoramah voter mipa 422319 leh hmeichhia 450367, a vaiin 872686 an awm a. Kum 2005 khan Mizoramah Special Intensive Revision neih hnuhnun ber niin voter mipa 276488 leh hmeichhia 280274, a vaiin 556762 n awm thung a ni. Kum 2005 Special Intensive Revision neih tuma Electoral Roll chu Chief Electoral Officer, Mizoram website ceo.mizoram.gov.in/ ah dah niin, mahni a in zawn chhuah theih a ni.

Lalnghinglova Hmar in “Meet your MLA” program hmang

Aizawl: September 10, 2025 khan LESDE Minister Lalnghinglova Hmar chuan Govt KM Higher Secondary School-ah “Meet your MLA” program hmangin school 13 hnenah school mamawh green board, white board leh water cooler semna hun a hmang.

  Minister chuan “Meet your MLA” program lo chhuah dan sawiin zirtirtute leh zirlaite tihphur nan te, zirtirtute hnen a mahni in rintawkna tuh(confidence) siam nan leh school chawikan leh hmasawnna atan a nih thu a sawi. Zirlaite chu taima tak a zir tur leh an zirlai dah hmasa ber turin Minister chuan a fuih a, zirlai rilru chak lo tan pawn taimakna nen chuan tlai luat a awm loh thu sawiin theih tawpa zir turin a chah a ni.

Hulhhliap Short Stay Centre Chief Minister-in a tlawh

Aizawl: Chief Minister Lalduhoma chuan sawrkar-in PPP Mode-a Synod Camping Centre, Neihbawia a kalpui Hulhhliap Short Stay Centre chu September 10, 2025 khan a tlawh a, Social Welfare Minister Lalrinpuii chuan a tawiawm.

  Hulhhliah SSC hi tum khata mi 150 zel enkawl theihna tura duan ni mahse diltu an tam avangin batch hmasa berah mi 256, batch hnihnaah mi 544 leh batch thumna, tuna kalpui mekah hian mi 208 admit an ni a.

  Hulhhliap Short Stay Centre kalpui nan hian sorkar chuan Rs. 108 lakh a pe a. Batch 4 na hi September thla hian neih leh tum niin a tul anga kalpui chhoh zel tur a ni ang. Batch hmasa ber leh a dawttua lutte an chhuizuinaah vawiin thlengin zaa sawmsarih leh pali (74%) te chu ruihhlo lakah an fihlim zui zel tih hmuhchhuah a ni.

Bal zirchianna Health Minister Lalrinpuii’n a tlangzarh

Aizawl: Health and Family Welfare Minister Lalrinpuii chuan September 10, 2025 khan a office chamber-ah Bal chungchang zirbingna “Research on Phytochemical constituents & galactagogue properties of Colocasia esculenta (taro) and determination of its nutritive value” report bu a tlangzarh.

  He zirbingna hi Laithangpuii College of Pharmacy faculty leh research team ten kum khat chhung ngawrh takin an bei a. Mizoram University, Mizoram Food Processing Research and Training Centre, RIPANS te leh NIPER Guwahati ten technical support an pe bawk.

  He zirbingna in a hmuhchhuah tlangpui te chu: Balah hian compound thenkhat alkaloids, flavonoids te leh glycosides a awm tih hmuh a ni a. 

International Literacy Day 2025 Education minister-in chhim

Aizawl: School Education Department Minister Dr. Vanlalthlana chuan September 8, 2025 khan International Literacy Day, 2025, Janpath Road, New Delhi a neih chu chhimin thu sawina hun a hmang a. Mizoramin 100% literacy rate a neih chhan chu tanrualna zar a nih thu a sawi.

  Minister chuan he hun kan thlen theih chhan chu State leh Central Sawrkar kan thawhhona that vang te, Kohhran, NGO, Civil Society leh Education Department te tanrualna rah a nih thu te sawiin hei maiah duhtawk lovin zirna, a bikin skill development lamah hma sawn zel tura tan kan lak a tul thu a sawi a. India ram chu ziak leh chhiar thiam vekna ramah siam turin Mizoram chuan Sawrkar laipui chu puih a inpeih reng thu a sawi a ni.

MSHCS official Website - mshcs.mizoram.gov.in tlangzarh

Aizawl: Mizoram State Healthcare Society (MSHCS) official Website - mshcs.mizoram.gov.in chu September 8, 2025 khan Health & Family Welfare Minister Lalrinpuii chuan SAD Conference Hall - II, MINECO -ah mipuite hman theih turin a tlangzarh.

  He website kaltlang hian MUHCS chungchanga zawhna tam tak awm thin, empanelled hospital awm zat te, MUHCS kalphung leh MUHCS chungchanga thuthar apiangte chu rang takin a hriat nghal zel theih tawh dawn a ni.

Meichher Golden Jubilee Special Edition 2025 tlangzarh

Aizawl: Directorate of School Education, Aizawlah Adult Education Wing, School Education Department buatsaih, ziak leh chhiar thiam hlutzia leh a pawimawhna inzirtirna “International Literacy Day 2025” lawmna Septermber 8 khan hman a ni. Home minister K. Sapdanga, chuan khuallian niin hun a hmanpui a, ULLAS booklet, Meichher Digitization leh Meichher Golden Jubilee 2025 Special Edition & Souvenir te a tlangzarh nghal a ni.

  Khuallian Minister Pu K. Sapdanga bakah hian Pu T.C. Lalremsiama, Asst. Director, Adult Education leh Pu R. Lalrawna, Meichher sulsutu leh Padma Shree Awardee ni bawk ten thu an sawi. R. Lallianzuala, Chairman, Meichher Golden Jubilee Special Edition Sub-Committee chuan Meichher Golden Jubilee 2025 Special Edition & Souvenir chungchang sawi hawnna a nei bawk.