ZALEN June 29, 2026: Champhai District Narco-Coordination Centre (NCORD) Committee chu vawiin khan DC Conference Hall, Keifangtlang ah an thukhawm.

Addl. DC Lalbiakfela chuan he hun hi kaihruaiin kalkhawmte lawmna thu a sawi a, Department hrang hrangte chu ruihhlo man kawngah thawhhona tha lehzual nei turin a chah a, May hi 26, 2026 atanga June hi 28, 2026 chhunga Police, Excise, Assam Rifles leh Food & Drug, CMO Office te ruihhlo man dan tarlan a ni.

Champhai Police te chuan hemi hun chhung hian ND&PS Act tlawhchhanin thubuai 23 an ziak lut a, mihring 28 an man bawk. An mante zingah hian mi 10 te chu Myanmar mi an ni a, a dang mi 28 te chu India khua leh tui an ni thung. May ni 27 atanga June ni 28, 2026 chhung khan Champhai Police te chuan Heroin Kg. 2.156 an man a, Methamphetamine Kg 63.554 an man bawk a, ruihhlo phurhna atana hman lirthei 11 an man tel bawk. Champhai Police te chuan June ni 25 khan District Court leh District Hospital te nen tangkawpin Govt. Champhai High School-ah International Day against Drug Abuse and Illicit Trafficking pualin Legal Awareness Campaign an buatsaih bawk.

Champhai District Excise & Narcotics Department chuan May ni 26 atanga June ni 28, 2026 chhung khan ND&PS Act. tlawhchhanin thubuai 15 an ziaklut a, mihring 19 an man thung. Hemi hun chhung hian Heroin gram 514, Methamphetamine gram 950, Ganja gram 188, Nitrazepam gram 770, Altrazolam gram 42.240 te an man a, ruihhlo phurhna atana hman lirthei 7 an man a, 5 chu 2 wheeler niin 2 chu LMV a ni. Excise & Narcotics Department te hian June ni 26 khan SYMA te nen ND&PS Act leh MLP Act chungchangah Sensitization Program an buatsaih bawk a ni.

Assam Riffles chuan chuan June thla chhung hian tum 6 ruihhlo an man a, an ruihhlo mante hi Heroin vek niin hawng 32, gram 381.36 a rit an man a, cheng 2,86,01,500 hu an man a, ruihhlo phurhna atana an hman lirthei 3 an man a, Methamphetamine mum 9,786, cheng 2,93,58,000 hu an man bawk a, heng ruihhlo an man te hi Champhai Police leh Excise & Narcotics Department te kutah an hlan vek a ni.

Food & Drug, CMO Office te chuan damdawi dan lova zawrh tur Police te puihnain tam tham tak cheng 2,27,45,444 hu an man a, heng damdawi te hi mi 3 te kut atanga man niin damdawi zawrh theihna license nei lo vek an ni a, an chungah dan anga hmalak nghal a ni bawk.

SYMA pawhin a hranin ruihhlo tualchhunga zuar thinte tam tak an man tawh thu leh ruihhlo zuartu bakah ruihhlo ngawlveite mi engemawzat Home ah an dahluh thu an tarlang ve bawk.