ZALEN November 1, 2025 : Vawiin khan Dr. R. Lalthangliana MNF Senior Vice President leh 2-Dampa (S/T), Assembly Constituency by-election a MNF official candidate chuan Saithah, Lallen, Kawnmawi leh Chhippui-te a tlawh a, Thlan tlin anih chuan VC, Political party leh NGO te telna Village Level Plan din a tum thu a hrilh.

MNF official candidate Dr.Thangtea chuan, "Dampa bial khawtin hian mamawh hrang theuh an nei tih ka hmu a, an mamawhte pawh a inanglo hlawm hle a. Thlantlin ka nih chuan VC, political party hrang hrang leh NGO hrang hrangte nen inrawnkhawmin kan la hriat ngai loh, 'Village Level Plan' dinin, khaw hrang hrangten an khaw mamawh bik an neih ang zela an harsatna sutkianna turin hmalak ka tum a ni," a ti.

Dr.R.Lalthangliana chuan ZPM sorkarah rulling MLA leh Opposition MLA-te an danglam bik vakna a hriat loh thute a sawi a. Dampa bialah hian ZPM hian MLA neih belh se la, ZPM sorkar chu a ngai renga a kal tur thu sawiin, "Kei hi min thlang tling u la, in bial tan danglamna nasa tak ka thlen ngei ka inbeisei a, in inchhir ka ring lo. Ka nau boral ta Pu Rintluanga ral nan leh kan mittui tlate min hrukhulsak turin in khawngaih vote ka dil takmeuh che u a ni," a ti bawk.