ZALEN March 19, 2026: Vawiin ni March ni 19, 2026 (Ningani) hian Gauhati High Court, Aizawl Bench chuan Mahindra car loan cheng vbc 150 vel tih chingpen thubuaia, District & Sessions Judge, Aizawl-in Anticipatory Bail dilna, Bail Application No. 28/2024-a bail phalna a lo pek tawh thiah dilna chu a ngaihtuah leh a. He thubuai hi Justice Sanjeev Kumar Sharma thutna bench-ah ngaihtuah a ni.

Mahindra thubuai kaihhnawiha petition hrang hrang thehluh te chu a ruala ngaihtuah a ni. 

Anticipatory Bail order May ni 27, 2024-a thiah dilna chungchangah hian objection (hnialkalhna) chu thehluh a nih tawh thu court hnenah thlen a ni a. He thubuaia hi chawlhkar li hnu, April ni 20, 2026 emaw, atanga ngaihtuah leh tur dah a ni. Thubuai ngaihthuah leh ni hian hearing neih a ni ang. 

Court chuan affidavit la thehluh loh te chu hearing neih hma ni thum la awmah thehlut fel vek turin a hriattir bawk.

Mahindra hian ni March ni 29, 2024 khan Crime and Economic Offences Police Station-ah car loan tihchingpen chungchangah hian FIR an thehlut a, thubuai case no.3/2024 chu section 34/120B/408/419/466/467/468/471/472/477A IPC hnuaiah ziah luh a ni a. He thubuaia motor dealer, Paul Zothanpuia chuan anticipatory bail hi dilin, District & Session Judge hian a dilna phalsakna order chu May ni 27, 2024 khan a chhuah a. Mahindra hian Section 439(2) r/w Section 482 CrPC, 1973 hnuaiah he order May ni 27, 2024 hi High Court-ah thiah dilna an thehlut ta a ni.

He thubuai hi ni June ni 20, 2024 atangin ngaihtuah tan a ni a, kum hnih chuang kalpui a ni tawh a nih thu Supreme Court-a Advocate on Record hna thawktu JC Lalnunsanga'n a website-ah a tar lang.