Mizoram puma kumtlinglo dan bawhchhia zirchianna in a tarlan danin 95% te chu ruihhlo engnge maw ber khawih an ni a; 80% chu chhungkaw mumal lova sei lian an ni bawk. Child Rights and Protection : Issues and Challenges  tih chhuahhlim bu chhunga ‘Situational analysis of children in conflict with Law in Mizoram’ zirchianna in a tarlan danin dan bawhchhia kawmchian zingah  80% te chu nu leh pa kara sei lian lo, chhungte bula awm, nu emaw pa zawkin a kawl te an ni a. Zirtirna tha an dawng lova, a enkawltute pawhin zirtir pawi mawhna an hre lem lo  bawk a ni. Kumtlinglo man zinga 95% te chuan dendrite, ganja, zu, herion hmangsual tawh te an ni a. An thian kawm te atanga an chin ni tlangpuiin thian an neih loh hlauh vanga ching chhunzawm an ni a. Ruihhtheihthil hlauhawmna hrilh hriat an ni ngai lo bawk a ni. Heng naupang zingah hian nu/pa hrang hrawn an awm nual a. Ei leh in dawng mumal lo  leh ngaihsak hlawhlo an awm bawk. Naupang dan bawhchhia te hi a tlangpuiin pawl 9 leh 10 pass lo an ni deuh zel a, ‘drop out’ dang kawmin nunchang tha lo an chin chhoh phah zel a ni. 2014-2015 khan Mizoram district 8 ah kumtlinglo dan bawhchhia 253 case ziah luh a ni a, kum 9-12 inkar chu 21 an ni a, kum 13-14 inkar ah naupang 69 an awm a, kum 15-17 inkarah naupang 163 an awm bawk a ni. Data lakkhawm atanga a lan dan chuan 91.69% chu mipa niin 8.3% chu  hmeichhia an ni. Mizorama kumtlinglo dan bawchhia mipa hmeichhia ration chu 9:1 anga ngaih theih a ni bawk a ni. Man tawk zingah hian 56% chu ruk ruk a ni a, 11% chu pawngsual, 8% chu zu kaihhnawih, 1% chu tualthah vang a ni bawk a. 3% chu drug kaihhnawih vanga man an ni a, tharum thawh leh a kaihhhnawih ang chi 10%  an awm bawk. A bak zawng chu intihnat, kidnapping, pawisa lem siam, mi vau leh tihthaih te an ni.