-Bawihtei Pa

Damdawi siamtu company leh doctor-ten damdawi chawh tur chungchanga inrem siamna neia an thawhdunna hi pharma - doctor nexus an ti a. India ramah hei hi thil thar a ni lo va, hman ata tawh ngaimawh a ni a, mahse tihreh mai theih a ni lo a ni ang. 

Engtin nge ?

Pharma company-te hian an damdawi siam chhuahte hming (brand name) an phuah thin a, damdawi composition inang thlapa siam, hming hrang nei si a awm thluah chhan hi a ni; hetiangin – Paracetamol (generic) chu Abbott chuan Calpol an vuah a, Pfizer-in Metacin, GSK-in Crocin, chutiang zelin. Azithromycin (generic) chu Cipla chuan Azee, Alembic-in Azithral, Lupin chuan Zady. Metformin (generic) pawh USV-in Glycomet, Micro Labs-in Melmet, Lupin-in Gluformin an vuah a ni. A awmzia chu damdawi inang reng Pharmacopoeia-in formula a siamsa ang thlapa siam vek an ni a, an chakna pawh thuhmun vek tura ngaih a ni. A siamtute chuan an damdawite chu doctor-te hmelhriat tirin chawhtir an tum ta theuh mai a, doctor an hmin theih nan thilpek an inneih that siak a ni ber mai! Doctor an hmin tam poh leh an hlawk a ni mai a; doctor pawhin a thlawnin an chawh sak bik lo! Chutianga thawhdunna hnuaiah chuan damdawi quality leh a man hniam leh san ngaihtuahna hman a awm tawh lo va, an chawh apiang chu damlovin an lei zar zar a ni tawh mai! Pharma company-ten doctor-te hnena thilpek an pek hi a theuneu lo hle a ni tih ring phawt mai ila, an senso khuh zanin hlawkna an hmu let a, a sum thawhtu chu damna mamawh avanga doctor pan hram hramtu damlote kan ni. 

Branded nge Generic chu?

Doctor-te hian MBBS/BDS an zirlaiin damdawite hi khawi company siam emaw hmingin an zir ngai lo va, ni se chuan buaina a hringchhuak nasa ngawt ang ! Damdawi chu Generic hming (officially approved non-proprietary name) veka zir an ni zawk a, an zir zawha doctor hna an thawh hnu hian generic hming ni lovin, khawi company emaw siam hming (brand name)-in prescription an ziak ta daih thin a ni. Company bil damdawi doctor-te hmelhriattirtu berte chu Medical Representative (MR) te hi an ni a, physician sample pein an damdawi siam hming an chhinchhiah tir a, Company che na thei apiang an hlawhtling a ni mai awm e.  

Doctor-in branded emaw, generic emaw hman chungchangah thuneihna a nei nameuh mai a, damdawi leh natna chin hre ve lo tan pawngpaw sawisel ngawt theih a ni lo. Amaherawhchu, mithiamte ziak leh sawi thin atang chuan brand hming ni lovin, generic hming zawka damdawi inchawh thin tur niawm tak a ni; hei hi tunhma deuh atang tawha sawrkar duhdan ni pawhin a lang. Hetiang hian mawl te tein lo thlir ila -  

1) Branded leh Generic damdawite hi quality thuhmun renga ngaih an ni a, generic hminga zawrh chhuahte hi an tlawm em em zawk a ni. 

2) Natna benvawn nei damdawi mamawh reng tan phei chuan branded damdawi hi a hautak a, generic damdawi hmanga inenkawl a fuh zawk ang. 

3) Senso hautak luat avangin damlovin branded damdawi a ei regular loh phah thei. 

4) Damlo tan doctor ziak damdawi branded kher zawn hmuh a harsa fo thei a, damdawi zuartu tan doctor ziak ang ni lo pek theih a nih si loh avangin, buaithlakna chen a awm thei a ni. 

5) Doctor-in branded damdawi a promote sak rual hian, company nen an inzawmna thuthlung avangin damlo mamawh em em loh dam­dawi dang chawh tel a ni fo; hei hian senso a tisang a, a pawi thei bawk.

India ram dinhmun :

Medical Council of India (MCI) chuan kum 2016 daih tawh khan generic hminga prescription ziak turin hriattirna a lo chhuah tawh a, The NMC Registered Medical Practitioner (Professional Conduct) Regulations, 2023 pawhin chutiang tho chuan a sawi. Mahse doctor-ten an zawm duh lem lo va, kalphung tur nghet awm hlei thei lovin thu a insual mek reng a ni. Department of Pharmaceuticals, Ministry of Chemicals & Fertilizers, Govt. of India pawhin kaihhruaina (guidelines) ‘Uniform Code of Pharmaceutical Marketing Practices (UCPMP)’ a siam a, guidelines a nih miau avangin dan (law) anga lekkawh tak tak theih a ni lo va, pawisak a hlawh lem lo. Heng zawng zawng atang hian sawrkar laipui rilru a chiang a, damlo enkawlna hi sumdawnna ang zawnga kal lutuk tha a ti lo tih a lang a, damdawi man senso sang hi tihnep a tum a ni. 

Kum 2008 khan damdawi senso tihhniam nan Pradhan Mantri Bhartiya Janaushadhi Pariyojana Scheme (PMBJP Scheme) sawrkar-in a duang thar ta a. He Scheme hnuaia generic damdawite hi branded damdawi aiin 60-90% vel zetin a tlawm zawk a, he Scheme tilar tur hian rampumah hmalak mek a ni a, India ram state thenkhatah chuan an hlawhtlin chhoh pui hlea sawi a ni. Amaherawhchu, doctor-ten branded damdawi an la ngainat zawk avang leh duhthusama Janaushadhi Generic Store a la tam tawk loh avangin branded damdawi hian hmun a la chang tam em em zawk a. Generic hmingin prescription ziak thin se chuan damlo tan senso nasa takin a zangkhai dawn tih hi a lang reng a ni.  

Mizoram dinhmun :

India ram hmun dang ang thovin pharma-doctor nexus hi a nasa ve nia sawi a ni a, kan doctor-te zingah pawh generic hminga dam­dawi chawh thin chu an tam lo khawp awm e. Private clinic atanga damdawi chawh chu pharmacy hawng nghal an nih chuan an kawl nghal vek tlangpui a, damlo tan hmun danga zawn buai a ngai lo va, sum sen erawh a sang thung. Hospital OPD atanga damdawi chawh a nih chuan khawi dawrah nge damdawite chu a awm tih hrilh an nih loh chuan damlo tan a buaithlak dawn a, damdawi dawr inkawh hmuh lawp lawp chang pawh a awm fo a ni awm e! Chumai a ni lo va, eng eng emaw test ngaiah private laboratory chenin pan tur leh duh bik doctor then­khatin an nei fo va, damlohna phen­ah hian sumdawnna network a lo inzam nasa khawp mai! Tun hnai­ah phei chuan pharmacy tamtak hi a neitu doctor an lo ni ta fur a ni awm e! 

Private Hospital kan ngah tate hi a lawmawm takzet a, la din belh zel thei se duhthusam a ni. Amaherawhchu, damdawi man senso sang lai bawk hi manganna thlentu chu a ni. Heng private hospital pharmacy-ahte hian branded damdawi bak damdawi dang a awm meuh lo va, damlote tan duhthlan tur a awm reng reng lo a ni. Heng hmunahte hian damdawi man tlawm ho hi a tam thei ang ber kawl ta zawk se damlo tan a van lawmawm dawn em! Test neuh neuh man chu thudang ni se, medical bill-a damdawi MRP thak thak a nih hian a turu a ni tawp mai; mirethei tan nat hi a rapthlak zual thin a ni! 

Tin, doctor prescription lo enchianga fimkhur taka damdawi pechhuaktu tur pharmacist-te hmel Aizawl khawpuiah ngei pawh hian pharmacy-ah hmuh tur an tam lo hi a veiawm bawk. Damlo damna leh himna kan ngaihpawimawh tak tak dawn a nih chuan pharmacist-te pawimawhna hi kan ngaihtuah a ngai a ni. Pharmacy-ah damdawi chin hre miah lo damdawi lei turin an kal a, damdawi chin hrelo leh damdawi hming pawh chhiar dik hleithei loten damdawi an lo pe a, damdawi diklo zawk inpek palh mai hi a van hlauhawm em! Damdawi chungchang zawt se hrilhfiah theilo hi damdawi zuar tam ber an ni. Pharmacist pawimawhna heng pharmacy-ah te hian sawrkar-in a lantir a ngai a ni.

District Hospital, CHC leh PHC ah meuh pawh damdawi enkawl tura pharmacist an awm mumal lo phengphung maite hi a pawi a ni. Damdawi zirve miahloten damdawi an enkawl a, engatinge sawrkar hian mipuite hriselna vawnhim nan pharmacist-te hi a vai vaia dah theih a nih loh pawhin damdawi hmunpui deuh chinah chuan a dah hram hram loh le? Sawrkar-ah pharmacist post ruak a tam hle nia sawi a ni si a. Damdawi mantlawm zawrhna Janaushadhi Kendra pawh hi District Hospital leh CHC chinah chuan sawrkar hian hawng hram awm tak a ni a, hei pawh hi pharmacist dah a nih loh vang bawka hawn theih loh nia sawi a ni lehzel a, a pawi khawp mai.