ZALEN, May 20, 2025: EverHome Pro Volleyball League 2025 khelh mekah league round paltlang zo lo hiala puan hman, TNT chuan champion tura rinkai, Tuichangral hnehin final an lut.

LPS Arena, Falkland-a Thawhlehni zana semifinal hmasa zawk khelhah TNT hian khawchhak club hi set hloh hmasa zet chungin 3-2 (23-25 25-13 21-25 25-21 15-11)-in an lehthal.

TNT hi team paruk inel zingah semifinal lut thei hniam ber (palina) niin an tlang hram a. League inkhel hnuhnung berah phei chuan tla tawh ang hiala puan hman kha an ni.

Tuichangral ve thung hi league-a a sang ber an ni a, TNT hi 3-1-in an hneh tawh nghe nghe a. Mizo player tha ber ber an kawl bakah state pawn atangin player tha tak, Rajneesh Singh an la lut a, an khelh tawh dan ena nomawi la ngei tura rin an ni a; mahse, hun pawimawhah Muanna Veng team an su tlang zo ta lo a ni.