ZALEN September 23, 2026: Maruti Suzuki New Baleno chu vawiin khan Nexa Showroom-ah Traffic SP C Vanlalvena, MPS chuan hralhchhuah theih turin a khuh hawng, hawnna inkhawm hi G.I.G general manager Joseph C Vanlalrinngheta chuan a kaihruai.

New Baleno khuhhawnna programme-ah EDP NEXA Biakchungnunga chuan hunserh hmangin, C Malsawmdawngkima, SDM NEXA chuan motor khuhhawn tak New Baleno sawihawnna a nei a, Maruti Suzuki Baleno thar chu engine thar hmanga thuam a ni a, Maruti Suzuki engine thar ber 1.2-litre Z-Series (Z12E) 3-cylinder petrol engine a ni a, engine hlui zawk K-Series 4-cylinder motor a rawn thlak a ni. Engine thar hi a performance tha zawk tura ngaih a ni, a ti.

“Mileage pawh tha zawk tura duan a ni, chumi piah lamah Maruti Suzuki engine thar hi RPM hniam zawka smooth zawka tlan thei tura duan a nih avangin tlangram kawngchho ah pawh RPM hniam zawk atangin torque sang zawk a pe thei a, fuat a nei tha a, an tang thei hle tura ngaih a ni,” tiin Biakchungnunga chuan a sawi.

Baleno hi 2015 a hralh chhuah tan a ni a, siam chhuah anih atanga hralh chhuah zawng zawng hi 2,000,000 niin, thla tina India ram motor hralh kal ber Top 10 ah a la lang pha char char a ni.

Baleno tharah hian Level 2 ADAS hman a ni a, ama rualpui, tlukpui car ah chuan a nei awmchhun a ni, hei bakah hian intelligent driver support system a nei a, motor himna turin safety leh assistance function pariat lai a nei. 

‘Stunning’ New Baleno hi ama rualpui, tlukpui car zinga ventilated front seat nei awmchhun a ni a, a seat zawng zawng cheimawi a, thuam thar an ni. 

Khuallian leh khuhhawnna hun hmangtu C Vanlalvena chuan Baleno thar chu car smart tak a nih thu sawiin a khalhtu leh a leitu te pawh smart hram hram se, kawngpui dunga an khalh hunah pawh smart takin, traffic rules bawhchhe lova, no parking-ah te motor hung lo hram turin a chah.

“Car nalh leh smart tak atanga bawlhhlawh paih mai mai te, hote tea traffic rules bawhchhiat te he car leitute chuan ching lo hram se tih hi ka chah duh a ni,” tiin khuallian C Vanlalvena, Traffic SP chuan a ti.

Maruti Suzuki chuan Nexa model Baleno cheibawl thar, facelift hi Spetember thlatir lam khan a tichhuak tawh a, September 23, 2026 ah G.I.G Motors hnuaia Nexa showroom chuan a phochhuak ve ta a ni. 

Model tharin a thlak tak Baleno kan zawrhchhuah mek hi kum 2022 a an tuaithar kha a ni a, tuna model thar lo chhuak, new model / facelift hi vawi thum tih danglamna a ni.

G.I.G Motors CEO John Lalpeka chuan lawmthu sawina hun hmangin an customers te mamawhna umzui zel chu an tum ber a ni tih a sawi.