ZALEN November 10, 2025 : 18th Urban Mobility India (UMI) 2025, November 7-9, 2025-a Gurugram, Haryana a neih ah Mizoram sawrkar chu Mizoram Traffic Management System chungchang ah Special Award hlan a ni a. Lawmman hi Union Hon’ble Minister Manohar Lal leh Union Minister of State Tokhan Sahu, Ministry of Housing and Urban Affairs ten ‘Special Award’ an hlan a. 

Mizoram sawrkar aiawhin Lalmalsawma Pachuau, Secretary, UD&PA; Jacob Lalawmpuia, Director UD&PA leh Town & Country Planning Officer ten ten an dawng a ni. Urban Mobility India Conference hi Ministry of Housing & Urban Affairs hnuaiah Institute of Urban Transport(India) in kum tin huaihawt thin a ni a.

He Award dawng tur hian Award Selection Committee-in presentation nei tura a hriattir angin, Town & Country Planning Wing, UD & PA Deptt chuan October 16, 2025 khan Video Presentation bakah PowerPoint Presentation an pe a. Mizoram-ah traffic rules tha taka zawm a nih dan te, mipuiin dawh thei taka traffic buai nuai nuai lova an tlan thin dan te, tul lo ah horn hmehrik a nih ngai loh dan, Co-ordination Committee on Traffic Management te hmalakna te presentation ah tarlan niin Aizawl chu Silent City tia sawi thin a nih thu te tarlan a ni bawk. He an Presentation pek zulzui hian Award Selection Committee chuan Central Ministry ah recommendation pe in Mizoram Sawrkar aiawhin UD & PA Department a hotuten an dawng a ni.