ZALEN April 26, 2026: Tun hnaia India hmarchhak leh a chhehvela nungchate zirchianna kal zelah Mizoram University-a Department of Zoology-a head ni mek, Prof. H.T. Lalremsanga leh a research scholar, Dr. Lalbiakzuala te chuan Assam, Meghalaya leh Tripura-a an thawhpuite nen North Tripura district, Tripura-ah Ramdaidêp, Cyrtodactylus (Bent-toed Gecko) species thar hmuchhuakin a hmingah Cyrtodactylus jayaditya tiin an phuah. 

Nungcha hmuhchhuah thar chungchang hi April 14, 2026 khan European Taxonomical journal, European Journal of Taxonomy volume 1048 chuan a tlângzarh (published) a ni.

Prof. H.T. Lalremsanga chuan, “Cyrtodactylus-te hi khawvel pum huapah species 398 chhinchhiah ni tawhin India hmarchhakah species 31 hmuhchhuah an ni tawh a. Hei vang hian tun hnaiah ngun zawka zawn leh zirchian an nih atangin species thar hmuhchhuah belh zel an ni a, an biology pawh hriat tur a la tlem hle a ni,” a ti.

“Hmuh chhuah thar hming atan hian India hmarchhaka Herpetology-a sûlsutu leh thalaite nasa tak a tiphûr leh kaihruaitu, Dr. Jayaditya Purkayastha chawimawi nan a hmingchawiin kan phuah ta a ni,” a ti. 

Tuna mi hi a pian leh DNA zirchianna atang chuan Tripura-a hmuhchhuah tawh, Cyrtodactylus tripuraensis nen inhnaih berin DNA an inan lohna 4.7% niin a dawtah Ngengpui Wildlife Sanctuary, Mizoram atanga kum 2025-a hmuh, Cyrtodactylus ngengpuiensis nen 6.2%-in an danglam ve thung,” a ti.

Assam CM Himata Biswa Sarma chuan nungcha thar hmuh chhuah chu ropui leh chhuanawm a tih thu a sawi.