ZALEN May 25, 2026: Mizoram Pradesh Congress Committee chuan vawiin khan Bhavan-ah Political Session an nei a, he hunah hian MPCC PAC Member Joseph Lalhimpuia chuan thu sawiin "Tuirini Hydel project chhunzawm a nih avangin ZPM sawrkar lakah lawmthu ka sawi a ni," a ti.

Tuirini Hydel Project kalpui tur pawh Congress sawrkar bultana kalpui niin, kum 2018 Independence Day khan CM Lal Thanhawla chuan BRICS hnuaia New Development tanpuina hmangin 24 MW pechhuak thei Tuirini Hydel project thawh tur a nih thu a puang a. MNF sawrkar-in a zuia Kum 2019 Independence Day khan CM Zoramthanga chuan "Sorkar laipuiin 465 Crore senna tur 24 MW Tuirini Hydel project min pawmpui tawh a, reiloteah hna kan tan ang," tih a sawi a.

Chuti chung chuan kum 2020 June 4 khan CM chuan 'Technically leh Economically' a tlinloh avanga Tuirini Hydel Project chu titawp an nih thu sawiin thuchhuah a siam ta daih a, pawisa peksa pawh an return ta hial a. Congress hmalakna a nih avanga hna tan nghal mai theih an duh tlat lo kha a pawi a, chhunzawm se chuan a tam zawk zo tawhin state in MW 24 power a nei tur a ni a, a pawi a ni. MNF sorkar khan kalpui hleithei lova pawisa dawnsa pawh pekir leh duh hiala a awm hnuah ZPM sawrkar-in Crore 767 senga Tuirini Hydel Project a chhunzawm leh tur hi Congress party chuan lawmawm a ti hle a ni, a ti.

Joseph Lalhimpuia chuan Zoram Zirna (Education) chu politics khelh nan hmang tawh lo tura party dang te ngenin, "Quality Education kalpui mek lai leh khawvel tukverha thalaite dah tawh laia kan unau MNF leh ZPM tena zirna hi politics khelh nana an la hmang reng hi chu sim tawh se tih hi ka ngenna a ni.

"Kum 2014/15 a HSS lecturer indaihlohna avanga MPSC kaltlanga contract atana zirtirtu 20 an lak te kha dan hrang hrang siam thuahin vawiin thlengin contract lecture an la ni reng a, chutihlaiin inthlan dawna dan mumal hmang lova upgrade an tih, an dah ngheh leh si te kha an kalpel leh vek lawi si," a ti.

Zirtirtu thahnemngai leh School chhan deuh te an transfer zel a, inhlauhtawnna hri a leng a, thawhhona a tichhe em em ringawt mai a ni. Kalphung pangngaiah chuan chhan tha tak a awm, a nih loh chuan pension dawn hnaiah an transfer mang tawh lo a ni a, tunah chuan kum 2/1 lek la neite pawh chhan mumal sawi tur awm lovin an sawn ta dawr dawr a ni, tiin a sawi bawk.