ZALEN May 29, 2026: Lungkawlh Community Hall-ah Vawiin khan Hrangturzo East Block MNF Conference neih a ni a. Khuallian MNF Vice President Lalchhandama Ralte, LoP chuan thusawiin, tunhnai inthlan tum li awm tawhah 3-1 kan chak a, 4-0 a nih loh chhan chu kan chapo lohna tura Pathian remruat a ni, a ti a. CBI-in Lengpui Scam an chhuai tan a, sawrkar hotute an mu tui lo tan maithei niin a sawi.

"MNF chuan Zoram pumah block 60 vel kan nei a, opposition ni chunga block conference nei ngam ngat Hrangturzo biala MNF mipui tam tak kan kalkhawm thei hi a ropui hle," a ti a. "Report aṭanga kan ngaihthlak, he bial chhungah party danga min bazar santu an awm lote hi a ropui lehzual a, kan party hian par a la chhuang leh ngei dawn a ni," a ti.

MNF Vice President chuan, AMC inthlanpui result avangin kan lunghnur deuh a ti a. "AMC inthlan (ZPM MLA-te bial vek)-ah khan che ṭha lo angin lang mah ila, mithiam leh chik mite chuan MNF vote share aṭanga tehin hma kan sawn tih an hmu. Tin, tunhnaiah, inthlan lian tham kan neih tawhah 3-1 kan chak a. 4-0 a nih loh chhan chu Pathianin kan chapo a hlauh vang a ni. Kum 2028 MLA inthlanpuia chak ngei turin beka thlantui luang zawih zawihin kan thawk zel ang."

Tun sawrkar hotute hi an mu tui lo tan mai thei tih sawiin Chhantea chuan, "CBI-ten Lengpui scam chhui turin document an la khawm mek a ni," a ti a. "Unnati loan leh Ekta mall-te, MZP-te dodal mek pension tawh rawih nawn chungchangte hian ZPM chhungkua boruak a nghawng hle a. Chapo thei miah lo dinhmuna kan awm hi hrehawm tih nan hman tur a ni lo."

"Kan hotute policy leh program an duang mek. Kan economic program kha covid hripui avangin kan kalpui hlawhtling hman lo a, khati chung khan cheng nuai thum dawng chhungkaw tam tak an awm. Tunah hian kuthnathawktu te, thalai te tan programme kan duang mek a, kan la puang chhuak thuai dawn, a ti a. MNF sawrkar liam ta khan sikul 180 sawrkarah kan senglut (provincialised) a. Kum 2 leh a chanve chhung zirchian nan hun kan hmang an ti a. School 180 zinga 51 chauh Provincialise atan an pawm a. Rilru na takin school 129-te chu dinhmun hniam zawkah an lettir leh a ni. Khawtlang, nu leh pa rilru hliamin an siam tam hle a. Heng School an pawm tak lohte hi kan sawrkar leh hunah dinhmun sang zawka kan lo dah tawh angin, hmalakzui kan tum lehnghal ang," a ti.