ZALEN February 13, 2026: Mizorama Valentine's Day-a event langsar bera chhàl ngam V-Day puala thisen pek chu naktuk February 14, V-Day ah Aizawl leh district khawpui dang thenkhatah huaihawt leh a ni dawn.

Valentine's Day puala thisen pek hi kum 2010 khan tan a ni a, kumin a vawi 17-na tur a ni. Mizoram pumah 2010-2025 chhung khan V-Day pualin thisen unit 11,621 pek a ni.

Kumin 2026-a V-Day puala thisen pek rûnpui huaihawtna pui ber chu Dawrpui Multipurpose Hall-ah neih a ni dawn a; ZMCH Blood Bank-ah leh district dang thenkhata district hospital-ahte pawh huaihawt a ni ang.

Dawrpui Multipurpose Hall-a V-Day Blood Donation Camp-ah hian chawhma dar 10:30 atangin thisen pek tan theih a ni dawn. Chawhnu dar 1-ah function tawitê hman a ni dawn a, MLA Jeje Lalpekhlua khuallian a ni ang.

Thisen pe apiang hnenah rose mawi tak pek zel a ni dawn. Rose pe turte chu - tunlaia thalaite lawm hlawh Frankie Khiangte, Mizo Film Award hnuhnung bera Best Actress dawngtu Rosy Lalramthlengi, filmstar leh zaithiam Vanlallawmawmi te an ni.

V-Day thisen pek rûnpuiah hian kum dangah chuan zaithiam thahnem tak an fuan khawm a, zaithiam lar ber berte an 'perform' thin. Kuminah erawh chuan zai ngaihthlak tur awm dawn tho mah se, a tam lutuk dawn lo a ni.