ZALEN February 11, 2026 : ZALEN February 11, 2026 : ZPM Consultant Er. C. Lianlunga leh ZMP Gen. Hqrs. Secretary rualten vawiin khan Sairang atanga Vairengte inkar kawng siam that hna an en a. Mizoram mipui châk lakna kawngpui pawimawh ber siam that hnathawn an en a, contractor 3-te te chuan kumin April ni 30-ah zawh hman an tum thu leh zawh hman ngei an inrin thu an lo hrilh.

Kawng siamtu Ministry of Transport & Highway hnuaia awm National Highway enkawltu National Highways & Infrastructure Development Corporation Limited (NHIDCL) leh an hnuaia thawk contractor pathum - Balaji, BR Goyal leh J. Infratech Private Limited (Jandu) ten chuan an hmachhawp leh an harsatna an lo thlen.

NHIDCL Project Manager, Saksham Tyjia chuan, "Vawiin atangin Buichali atanga Sairang Zero Point kawng thuam thlenga cement concrete-a chhun hna bik, meter 820 hna hi contractor Jandu hian an an a. "A khuar hnawh hna thawk mekin, km 11 resurfacing leh bitumen concrete chul mam hna hi April ni 30, 2026-ah zawh tum a ni," a ti.

ZPM team leader Er. C. Lianlunga, ZPM Consultant chuan, "Kum danga fur ruah tui tlak laia kan 'life-line' pawimawh ber chhiat avanga harsatna kan tawh ang te kuminah tawh kan tum tawh lo a. Thawktute harsatna te a hmunah kan enpuiin kan ngaithla a, April ni 30, 2026-a zawh an tum ang ngei hian an zawh hman ngei kan beiseipui a ni," tiin a sawi.

Kawnpui khaw chhung Aizawl chhuah lama kawng chhia leh khu lutuk chu Kawnpui VC ten thu lo thlenin, NHIDCL leh contractor-te nen sawi ho nghal a ni a. A khu leh tlan harsa zualpui chu hnawh nghal turin contractor-ten hma an la nghal dawn a ni.

ZPM Consultant hi Buichali leh Khamrang inkara Jandu ten Hot Mix Plant an bun chu Mizoram Pollution Control Board (MPCB) ten an endik tawh tih an lo hrilh a. Mahse, MPCB te hian hna thawh phalna an la pek loh avangin harsatna an tawk a, ZPM team leader Er. C. Lianlunga hian Forest Minister Lalthansanga hnenah leh MPCB Chairman hnenah thlen nghalin, Minister hian hma a la nghal a ni.

July ni 7.2025 khan he kawng enkawl hna hi Mizoram PWD chuan NHIDCL kutah an hlan a. Anni hian contractor 3 thlang nghalin hna hi an thawk mek a ni.

Vairengte atanga Sairang inkar kawngah hian Sairang atanga Buichali hi Jandu siam a ni a, Khamrang atanga Buichali - BR Goyal kut niin, Khamrang atanga Kawnpui - Jandu, Kawnpui atanga Kolasib - Balaji leh Bilkhawthlir atanga Vairengte - Balaji te kuta awm a ni.