ZALEN May 1, 2026 : Vawiin khan Mizo Pasaltha Vana pa (Thangzachhinga) Thlan, Hnahlan ram Tuithoh luikama awm chu a tuchhuante'n an tlawh. He huna thusawitu Vana pa tuchuan ngana C. Thasiama chuan Tuithoh lui kama mi chauh lo Vana pa thlan hmun dangah a awm an hriat loh thu leh tun hnuah chuan sawi zui tawh lo turin a ngen.

He hunah hian Mizoram hmun hrang hrang leh ram pawn atangin Vana pa thlahte mi 30 chuang fe an kalkhawm a. Kum 2019-a Vana pa Thlan kianga hriatrengna lung an phun chu an chei tha nghal bawk. Hemi puala hun hman hi Chawnglianmawia, Chairman, Vana pa Thlan Sub-Comt. chuan kaihruaiin, Vanapa thlahte hnen atangin thusawi ngaihthlak a ni. 

C. Thasiama, Vana pa tuchhuan ngana chuan, Hnahlan khawtlangin an pu thlan duat leh uluk taka an lo enkawl thin chu lawmawm a ti a. A thlan hmun awmna thuah inhnialna awm neuh neuh thin mah se, thlahtute atanga thu an lo inhlan chhawn angin Hnahlan ram, Tuithoh luikam hi an pu lunghahna tia chhungkuain an pawm tlan anih thu leh kum 2010-ah Hnahlan Community Hall-ah chhûngkuain an nemngheh tawh thu a sawi. Vana pa thlan hi Tuithoh lui kama mi chauh lo chu hmun dangah a awm an hriat loh thu leh tun hnuah chuan sawi zui tawh lo turin a ngen.

Mizo Historian C. Lalaudinga pawhin thusawiin, Vana pa Thlan hi hun rei tak ata Hnahlan khuain an lo humhalh tawh a; upate titi, chhungkaw thu inhlan chhawn leh ziaka kan hmuh atangin Vana pa hi Tuithoh luikama thi ngei a ni tih hi zoramin kan pawm tlan ber a ni a ti a. Kum 2004-ah Art & Culture Dept te nen thlan phawrh anih tumah pawh archeological evidence tha tak tak hmuh a nih thu a tarlang bawk.

He hunah hian Vanapa Group YMA hruaitute, Hnahlan VC, YMA leh khawtlang mipui thahnem tak an kalkhawm a. Mizo zaithiam Thangromawia Thomte leh KC Hmingtea, Vana pa tuchhuan te'n zaiin kalkhawm an awi a, chaw hlui kilho nghal a ni.