ZALEN, September 26, 2025: Mizoram Volleyball Association (MVA)-in Nilaini atanga volleyball-a khua leh veng inelna a buatsaih turah mipa lamah champion lai, Khawhai Village Council hovin team 68 an inlan dawn a, hmeichhiaah team 12-in an khel dawn bawk.

Inter-village volleyball tournament hi October 1-10, 2025 chhungin R Dengthuama Hall, Mualpui, Aizawlah khelh tura ruahman a ni.

Inelnaa tel tum tan Ningani zan thlenga hming pek theihna hun hawnah mipaah team 68 leh hmeichhiaah team 14 an inlan dawn a. Fixture hi MVA Technical Committee-in an buaipui zui nghal mek.

Mipaah hian inelna neih hnuhnung ber, kum 2023-a final-a inhmachhawn pahnih, Khawhai leh Hunthar Local Council team chu khel tura hming pe hmasa zingah an tel.

Anni bakah hian nikuma inter branch YMA volleyball-a champion, Mizorama volleyball hmunpui pakhat, Muanna Veng LC pawhin hming an pe bawk.

Hmeichhe lamah erawh champion lai, Kolasib Diakkawn VC leh finalist chu an inlan dawn lo thung a. YMA volleyball champion lai, Bungkawn LC erawh inlan tura hming pe hmasa pawl zingah an tel.

Inelna tel tum hming pe tawh zingah hian mipa leh hmeichhe team tel kawp tur veng/khua paruk an awm.

Tun tum inelna atan hian MVA leh LPS Vision Production chuan inremna siamin cable TV leh social media-ah live-in inkhel pek chhuah a ni ang.

Tournament hnuhnung ber, kum 2023 khan mipa 80 leh hmeichhia 27, a vaiin team 107 an tel a. Hmeichhe inelnaah Kolasib Diakkawn VC-in nomawi humhimin final-ah set hloh lovin Thenzawl East an hneh a, mipa final-ah Khawhaiin set thum set khata Hunthar hnehin a vawi khat nan an champion bawk.

Nikum khan veng leh khaw inelna lian dang, YMA volleyball tournament neih a ni ve thung a, team 101, mipa 73 leh hmeichhia 28 telin mipaah Muanna Veng leh hmeichhiaah Bungkawn an champion.