ZALEN July 07, 2026: West Bengal a kristian-te laka hleilenna leh tihduhdahna thleng mek chuan zual lam a pan zel a. Tun hnaiah Mizoram Synod hnuaia biak in sak lai chu misualten suasamin, kraws-te pawh tihchhiatsak an ni.

ZALEN thu dawn danin July ni 5 ah khan Sonarpur bial chhunga Suvas Gram-a Mizoram Synod biak in sak lai chu misual rualin an bei a, biak in chunga kraws intar an la thla.

West Bengal-a thawk mek, Rev. Vanlalawmpuia'n ZALEN a hrilh danin Suvas Gram-ah hian Mizoram Synod hian ram neiin, LSC pawh tih fel vek a ni a; tunah hian Kristian 100 chuang an awm mek a ni. Pawi khawihtute hian he hmunah hian Kristiante biak in awm tur hi an remti lo nia hriat a ni a ti.

Police-te chuan bul tumtu bera an hriat pakhat chu an man nghal a, pawi khawihtute hi Suvas Gram mi leh sa ni loin, hmun dang atanga lo kal an nih thu an sawi.

Kohhran hruaitute chuan he thil chungchangah hian FIR an theh lut a. Hetih lai hian, bialtu MLA chuan he inbeihnaah hian BJP an inhnamhnawih loh thu a sawi thung.

Matters India-in a tarlan danin, tun hnaiah West Bengal hmun hrang hranga Kristiante tihduhdahna hi a thleng ngun hle a, thil thleng langsar zual te :

Murshidabad: Kristian hmeithai Barnali Chatterjee-i chenna in chu beih a ni a. A sakhaw rin bansan tur leh a hmunhmate chu sakhaw dang biak in (temple) sakna atana hlan turin an nawr lui a, a ina bungrua te pawh an tihchhiatsak a ni.

Bankura: Pastor Rajib Das-a hoa an inkhawm lai chu misual rualin tibuaiin, an Bible te an laksak a; biak ina inkhawmte chu hun rei lote chhung an hreng lui bawk.

Faridpur: Grace Church-a inkhawm lai chu beih zui niin, biak in an tichhia a, Pastor leh inkhawm lai mipuite chu kut an thlak bawk a ni.