ZALEN, December 17, 2025: Women’s Under-19 One Day Trophy Plate-ah Mizo tleirawlte chu khelh thum an inlanah hnehna an la chang vek a. Nilaini khan Lalnunmawii wicket nga lak leh Vanlalruatpuii half century vuak chhuak hmanga wicket sariha Manipur hneh lehin final luh an hnaih ta hle.

Lady Amritbai Daga College Ground, Nagpur, Maharashtra-a Plate Group inkhel vawi thumnaah hian thum vawra chak, Manipur-in vuak hmasak an thlang a, over 40.2 chhungin run 156 tlinin an thi zo va, bul tan chhe lutuk lo mah se a tawp lam wicket nga chu Nunmawii lakah an hloh vek.

Manipur tan Barkatun-i’n run 53 siamin an siam tlem lutuk tur a chhan him a, captain Taniya Ningthoujam chuan run 26 a thawh bawk a. Mizoram tan Damdiai tleirawl Nunmawii bakah Zonunmawii Rokhum leh Sandhia Rai ten mi pahnih ve ve an vawm hlum bawk.

Mizoramin an umnaah opener Ruatpuii a langsar a, run 65 vaw chhuakin mi pathum chauh thiin over 44.4-ah an run mamawh a thawh chhuahpui a. Ani bakah hian a tawp thlenga dam pahnih, Karie Chakma (run 29) leh Jacinta Laltanpui (run 21) an ding nghet viau bawk.

Tlangnual tleirawl, Ruatpuii hi tun hnaia an champion-na Under-19 Twenty20 Trophy-ah pawh khan Mizoram tan player mala thawh hlawk ber pawl a ni a, final-ah Manipur lakah bawk half century a lo vaw chhuak tawh bawk a ni.

Women’s Under-19 One Day Trophy Plate-ah hian Mizoram hian Manipur bakah Tripura leh Sikkim an lo hneh tawh a. Khelh thumah point 12 hmu tawhin hmahruaitu an ni mek a, an hmabakah hian a hniam lama awm pahnih, Arunachal Pradesh leh Meghalaya an hmachhawn leh dawn a, pakhata an chak chuan final an lut thei tawh dawn a ni.

Tar lan tawh thin angin Board of Control for Cricket in India (BCCI) hnuaia an association tleirawlte inelna, Plate bikah hian Mizoram hi T20 champion lai niin one day-ah pawh rinkai ber an ni mek a, an champion chuan season tharah Elite-ah an kai thei dawn a ni.

INKHEL KHAIKHAWMNA:

Manipur - 156/10 (Over 40.2)

Barkatun - 53 (76)

Lalnunmawii - 5/32 (Over 6.2)

Mizoram - 159/3 (Over 44.4)

Vanlalruatpuii - 65 (114)

Karie Chakma - 29 (33)

Wicket sarihin Mizoram an chak.