ZALEN, November 04, 2025: Mizo tleirawlten a hmaa an lo hneh loh tawh, Manipur lakah run 72-a hnehna changin Women’s U-19 T20 Trophy 2025-26 Plate champion nomawi an la ta a, season thara inelna sang zawka an inlan thei dawn.

Lucknow, Uttar Pradesh-a Bharat Ratna Shri Atal Bihari Vajpayee Ekana Cricket Stadium-ah final-ah hian Mizoram tan Vanlalruatpuii chuan half century siamin Branda Rosepawngia-i’n mi pathum a vawm hlum bawk.

Manipur hi thumvawrah chakin vawm hmasak an thlang a, tisual lutuk lo mah se Mizoram opener Ruatpuii an ngam lo va, Tlangnuam, Aizawl tleirawl hian ball 50 a hmachhawnah run 68 vaw chhuakin, semifinal-a Player of the Match-a thlan tawh, all rounder Sandhia Rai-i chuan a tawp thlenga damin run 29 a vaw chhuak bawk a, over 20-ah mi pasarih thiin run 117 an tlin.

Manipur vuak hunah Mizo bowler-te an ngam lo hle a, an zingah run 10 vaw chhuak tling tumah an awm lo va, run siam tam ber, Taniya Ningthoujam pawhin run riat chiah a vaw chhuak.

Branda-in wicket thum a lak bakah vice captain Sandhia-i leh Zothanmawii Rokhum ten pahnih ve ve an vawm hlum bawk a. Over 14.4-ah run 45 chauh siamin an thi zo vek a ni.

Mizo tleirawlte hian Manipur hi kar hmasaa group stage inkhelah wicket ngain an lo hneh lo tawh a, final-ah erawh chiang taka phuba lain season tharah India rama association thiam rualte inelna, Elite-ah an khel thei dawn ta a ni.

Tun hi Board of Control for Cricket in India (BCCI)-in inelna a buatsaiha Mizoramin champion nomawi a lak hmasak ber a ni.

INKHEL KHAIKHAWMNA:

Mizoram 117/6 (20 overs)

Vanlalruatpuii - 68 (50)

Sandhia Rai - 29* (24)

Manipur - 45/10 (14.4 overs)

Brandra Rosepawngia - 3/6 (3 overs)

Sandhia Rai - 2/5 (3 overs)

Run 72-in Mizoram an chak.