ZALEN, October 26, 2025: Women’s U-19 T20 Trophy 2025-26-a an inlan hmasak berah Mizo tleirawlte chuan Pathianni khan wicket riatin Nagaland an sawp a, Thawhtenni hian Sikkim nen an inhmachhawn zui ang.

Lucknow, Uttar Pradesh-a Bharat Ratna Shri Atal Bihari Vajpayee Ekana Cricket Stadium-a Plate Group inkhel hmasa berah hian Nagaland hi thumvawrah chakin vuak hmasak an thlang a, Mizo bowler-te an ngam lo va, an vaw thei lo hle a, over 20 chhungin run 48 chiah an siam a, mi pariat an thi.

Mizoram tan hian Sandhia Rai leh Jessica Lalmuanpuii ten chuan Naga batter pahnih ve ve an vawm hlum.

Mizoramin an umphak tura run ngai tam lo tak an umnaah hian K. Lalnunfeli chuan ball 30 a hmachhawnah run 20 vaw chhuakin a tawp thlengin a dam a, over 9.5 lekah an run mamawh an vaw chhuak a, mi pahnih thi hman mah se harsa lo takin hnehna an chang a ni.

Mizo tleirawlte hian Plate Group-a hmahruaitu dinhmun hauh nghalin an tumpui hneh vetu dang, Manipur leh Sikkim nen point li theuh an ni a, net run rate 2.583 neiin a chung ber dinhmun an hauh theih phah.

Board of Control for Cricket in India (BCCI) buatsaih Women’s U-19 T20 Trophy 2025-26 Plate Group-ah hian Mizoram hi Nagaland leh Sikkim bakah Arunchal Pradesh, Manipur leh Meghalaya te nen awmin an inkhelh kual vek hnua a sang pahnihin November 4-ah final an khel ang.

INKHEL CHANCHIN TAWI:

Nagaland 48/8 (20 overs)

Sandhia Rai - 2/7 (4 overs)

Jessica Lalmuanpuii - 2/14 (4 overs)

Mizoram - 49/2 (9.5 overs)

K. Lalnunfeli - 20*(30)

Karie Chakma - 13(13)

Wicket riatin Mizoram an chak.

MIZORAM KHELH HMABAK:

October 27, 2025 - Mizoram vs Sikkim

October 29, 2025 - Manipur vs Mizoram

October 31, 2025 - Arunachal Pradesh vs Mizoram

November 2, 2025 - Meghalaya vs Mizoram