ZALEN November 12, 2025: Vawiin khan Central YMA Hall, Tuikhhuahtlang ah CCC Meeting vawi 104-na neih a ni. He meeting hi Central YMA President R. Lalngheta chuan a kaihruai a, he hunah hian Khawmpui thurel chungchang sawiho a ni a, thurel tam zawk hi CEC kuta dah a ni. He hunah Red Bull Tlangruam huaihawtnaa Cheraw kan chungchang chu sawiho a ni.

YMA Inkhawmpuilian Vawi 75-na Sakawrdai a hman zawh tak chu thlir letna hun hman a ni a. Sakawrdai khua ten mikhual min thlen danah palai ten lawmawm leh nuam an tih thu an sawi a, rorel inkhawm erawh tun aiin palai ten ngaihpawimawh a ngaih thu leh inkhawmpui kal uar tura tan kan lak a ngaih thu te sawi a ni.

THURELTE

A. YMA KHAWIH

1. YMA inkaihhruaina leh nihphung leh hruaitute mawhphurhna, rampumah inzirtirna neih ni rawh se = CEC in ruahmanna rawn siam rawh se tih ani

2. Mizoram chhunga hnamdang sumdawng, phalna nei lo tam ta lutuk hi titlem turin YMA-in hma la rawh se = CEC in ruahmanna rawn siam rawhse tih ani

3. Mizo hmeichhia ten hnamdang pasal neih zel loh nan Central YMA hian inzirtirna nasa zawkin kalpui rawhse = Hma lak dan tur CEC in ruahmanna lo siam rawh se

4. Mizo infiamna te chawisan a nih theih nan Central YMA in hma la rawh se = CEC in hma lo siam rawh se tih ani

5. Zohnahthlak chi peng hrang hrang Mizoram a chengte zingah chi bil hmalakna a awm tawh loh nan Central YMA in hma la rawh se = CEC in hmalak dan tur ruahmanna rawn siam rawh se

B. SAWRKAR KHAWIH

1. Inner Line Permit (ILP) hi tun aia khauh leh awmze nei zawka kalpui anih theih nan YMA-in Sawrkar-ah thlen rawh se = CEC in ruahmanna rawn siam rawh se tih a ni

2. Tui hnar humhalhna dan siam ni rawh se = CEC in chak takin lo bawhzui rawh se tih ani

3. Mizoram chhunga inkalpawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theih nan Mizoram Sawrkarin tun aia chak zawkin hma la rawh se = CEC in ruahmanna lo siam rawh se tih ani.

CCC Meeting ah hian Palai kal te chuan tunhnaia Red Bull Tlangruam, Aizawla neih denchhena Mizo hnam lam Cheraw duhdah taka hnamdang ten an kan hi kan hnam lam tihbawrhbanna a nih thu leh tunhnuah hetiang hi thleng tawh lo se an duh thu an sawi.