ZALEN, May 09, 2025: LBS Suzuki 22nd Inter Branch YMA Football Tournament, 2025 khelh mekah dan pela che Serchhip Field Veng chu an hnehna chan laksak niin inelnaa khel zui tawh lo tura tlaktir an ni.

Nilainia 1st Bn. MAP Ground, Armed Veng, Aizawla Group D first round inkhelah Serchhip Field Veng hian 7-0-in Ramhlun Vengthar Branch hneh mah se an branch chhunga mi ni lo an khelhtir avangin Organising Committee chuan Tournament Regulation, Disciplinary Rules No. 6 chhunga 6.1-in a tar lan angin a chak lo zawk hi chak zawkah a puang.

Organising Committee Secretary Darremsanga Renthlei chuan Ramhlun Vengthar hi second Round khel tura inbuatsaih turin a hriattir nghal a. Ningani hian RG Stadium, Mualpui, Aizawlah 2nd round-ah Republic Vengthlang Branch nen an inkhel leh ang.

Serchhip Field Veng Branch hian Laltluangpuia, Chhingchhip chu F. Lalrindika, Serchhip Field Veng Voters ID No. WGQ0058933 hmangin a khel tih hriatchhuah a ni a. Tournament inkaihhruainain, “Eng team pawh thil dik lo ti (player khelh phal loh khelhtir, curruption et) man chhuah an nih chuan chak lo zawka puan/an lawmman dawng ang ang lak let vek thlengin hrem theih a ni ang...,” a tih angin hremna hi kalpui a ni.

Thawhlehnia khelh tan branch YMA-te football-a an inelna khelh mekah hian a tan hmaa hriattira tihchhuahah, “Player awmna tichiang turin Voter ID hman a ni ang a, Voter ID an neihna branch-ah bak an khel thei lo vang. Kumtlinglo an nih chuan Aadhar Card pawm a ni ang. Heng Voter ID leh Aadhar Card hi December 31, 2024 hnu lama transfer chu pawm a ni lo vang,” tih a ni bawk.