ZALEN, Aug. 03, 2026: Kum khat dana khelh thin, YMA branch hrang hrangte volleyball-a an inelna, LBS Suzuki Avenis 24th Inter Branch YMA Volleyball Tournament 2026 chu Thawhlehni atang hian khelh tan a ni dawn.

Kumin inelnaah hian mipa leh hmeichhe inelna a awm dawn a, mipa team 57 leh hmeichhe team 19 an tel dawn a, Zirtawpni zana Central YMA Hall, Tuikhuahtlang, Aizawla Ben Hawnnaah Mizoram Volleyball Association (MVA) President Dr Lalmalsawma Nghaka’n fixture a tlangzarh.

Central YMA leh MVA tangdun buatsaih inelna hi Ningani zing dar 9:00 atangin R. Denhthuama Hall, Mualpui, Aizawlah khelin karleh Zirtawpni thleng khelh a ni ang.

A tan niah hian mipa inkhel 10 leh hmeichhia pathum awm hman tura ruahman a ni.

Kuminah hian champion lai, Muanna Veng Branch chu Pool A-ah awmin khelh hmasak ber awlin Tuirial Branch leh Thanglailung Branch chak zawk zawk nen Ninganiah insuin inelna bul an tan ang.

Muanna Vengin kum kum 2024 inelna final-a an hneh, Hunthar Branch chu Pool D-ah awmin khelh hmasak ber an awl hnuah Tualcheng Branch leh Armed Veng South Branch inkhela chak zawk nen Zirtawpniah an inkhel ang.

Mipa inelnaah hian champion lai team hnih bakah ‘volleyball khua’ tia chhal ngam, Pro Volleyball League-ah pawh an khaw hlang deuhthawa inlan thei, Khawbel Branch leh khua leh khua inelnaah pawh lo champion tawh, Pro Volleyball League-a Tuichangral Volleyball Club hmunpui, Khawhai Branch an inlan bawk ang.

Hmeichhiaah champion lai, Bungkawn Branch chu Pool A-ah awmin Nilainia Hlimen Branch nen an inhmachhawn nghal dawn a. Finalist Vaivakawn Branch chu Pool B-ah awmin Nilaini vek hian Bungkawn Vengthar Branch an hmachhawn ang.

YMA volleyball hi Central YMA General Secretary Prof. Malsawmliana’n beng hawnhin YMA-in sports association hrang hrang nen thawk hova inelna an buatsaih thin chu Mizo thalaite tan a pawimawh a. An talent hai chhuaktu a nih bakah sports lama an ei zawnna kawngka hawngtu a ni bawk tih a sawi a. Inelnaa telte chu inkaihhruaina dan zawm theuh turin a ngen bawk.

MVA leh Central YMA hian inter branch volleyball tournament hi an buatsaih fo tawh a. MVA bik hian kum tina veng leh khaw inelna a awm theih nan YMA volleyball tournament a awm loh kumah inter village tournament an huaihawt thin bawk.

YMA volleyball khelh hnuhnung ber, kum 2024 khan mipa inelna Muana Veng chuan final-ah Hunthar chu straight set (25-19, 29-27, 25-21)-a hnehin an champion a. Hmeichhe inelnaah Bungkawnin Vaivakawn chu straight set (25-17, 25-23, 25-2) thova hnehin an champion bawk.

Aug. 04, 2026 inkhel turte (9:00 am-ah tan a ni ang):

MIPA:

Tuirial Vs Thanglailung

Phungchawng Vs ITI Veng

Chanmari West Vs Lungdai

Electric Veng Vs Sairang Sihhmui

Hmunpui Vs Pamchung

Tachhip Vs Sakawrdai

Durtlang Leitan Vs Hmuifang

Sihphir Venghlun Vs Zote Champhai

Sazep Vs Edenthar

Bungtlang Chhim Veng Vs Chawhhmun

HMEICHHIA:

Hmunpui Vs Rangvamual

Phunchawng Vs Dinthar

Tuirial Vs Sihphir