ZALEN, June 18, 2025: LPS Vision Production leh Youth Icon 2024 Top 10 tangkawpin khuarel chhiatna tuarte tana charity concert an buatsaiha mipui sum thawhkhawm chu Icon star-ten an sem chhuak.

Youth Icon top 10-te chuan Thawhlehni atang khan tanpuina sum hi an sem chhuak tan a. Vaivakawn Local Council hnenah Rs. 1,50,000 an hlan a, heng sumte hi Vaivakawn Zohnuai, Thlanmual bula lei khi avanga an chenna in rauhsana YMA Hall-a cheng lailawk rih chhungkaw 10 hnenah hlan nghal a ni.

Youth Icon 2024 Top 10-te chu Nilaini khan Serchhipah kalin Sub-Hqrs. YMA Serchhip Secretary Zonunsanga Kawlni leh Fin. Secretary H. Lalbiakhlua te hnenah Rs. 3,00,000 an hlan a. YMA hruaitute leh Icon Top 10 aiawh mi palitein veng paruk - Dinthar Veng, Saron Veng, Field Veng, P&E Veng, Chhim Veng leh Chanmari Venga vanduaina tawkte hnenah anmahni ngei kalin chhungkaw 20-te hnenah Rs. 15,000 theuh tanpuina an hlan.

Serchhip Sub-Hqrs. YMA chuan hetianga LPS Vision Production leh Youth Icon 2024 Top 10-ten khuarel chhiatna tuarte tana charity concert an buatsaih chu ropui an tih thu leh mipui sum thawhkhawmte Serchhip-a vanduaina tawkte hnenah an hlan chu lawmawm an tih thu an sawi a, hemi atana sum thawhtute leh branch hrang hranga lo buaipuitute chungah lawmthu an sawi bawk.

Charity concert hi June 7, 2025 zan khan buatsaih niin vehbur khawna mipui sum thawhkhawm hi Rs. 6,60,000 chuang a ni a, heng sumte hi khuarel chhiatna tawk nasa khua leh vengah te sem chhuah a ni.