Aizawl; Young Women Christian Association of Aizawl chuan Zirtawpni khan Engineers Club Babutlang ah general body meeting an nei a, kum 2014-2016 chhunga an pawl hruaitu tur an thlang nghal. Meeting hi an pawl president Lalrosangi Zama'n a kaihruai a, YWCA of Aizawl founder president Lalrosangi hnenah chawimawina hlan a ni. An pawl general secretary Liansangluri'n kum 2012-2014 chhunga an hmalakna hrang hrang report a pe a, resolution an siam zingah model constitution duan chu pawm a ni a, Edenthar veng huamchhung Hawngtial rama YWCA ram sawrkarin thildang atana a hmansak aia sawrkarin ram a pek tur chu chak zawka zawn nise an ti. Kum 1986-a din YWCA of Aizawl hmalakna lian ber hi HIV hrik kai te enkawl leh a darhzau zel loh nana hma lak a ni a. Hemi atan hian project neiin Mizoram hmun hrang hrang an tuam a ni. Hmeichhia te dinhmun chawikan leh dinhmun tleu te tuamhlawm kawngah te hma an lak bakah, mi harsa te tanpuiin 'Luanchhuah Programme' te an nei thin a ni. YWCA HRUAITUTE President- PC Laltlanmawii, Vice President - Lalhmingliani Hmar, General Secretary - Lucy Sailo Secretaries - Juliet Lalremruati leh Zothansangi, Asst. Treasurer- Jubilee E Muanzova.