ZALEN November 23, 2023: NH54 kawngpui laih mekah Serchhip District huam chhunga sawrkarin ram a lak fel tawh, dan anga zangnadawmna - compensation leh Rehabilitation and Resettlement sum leh pai dawng tawh te zingah in leh lo thiat duh lo lui an la awm avangin Serchhip District Administration chuan Competent Authority for Land Acquisition (CALA) an nih angin dan tlawh chhanin hma an la dawn.

Kar thar lo awm turah hian mahni in thiat duh lo te chu IPC Section 188 hmangin thubuai siamsak an ni dawn a, jail tan thlengin hrem theih an ni ang. Magistrate kaihhruaiin an in leh lo te chu nawrchhiat sak an ni ang a. Hetianga dan anga action lak kher a ngaih lohna turin District Administration chuan Serchhip District chhunga khaw hrang hranga in thiat duh lo la awm te chu thiat vek turin a hriattir nawn leh a ni.

NH54 kawngpui laih mekah hian Serchhip District huamchhunga compensation dawng tawh zingah 93% chuan an in te an thiat fel tawh a. Mi tlem te chauh thiat lo an awm tawh a. Heng khaw hrang hrang a Village Council te, khawtlang hruaitute leh khawtlang mipuiin kawng tha a awm theihna tura sawrkar hmalakna an thlawp tlat avangin District Administration chuan lawm thu a sawi a ni.

March, 2024 chhung ngeiin Sawrkar Laipui chuan NH54 kawngpui laih mek hi hawng hman ngei turin a hriattir a. Kawng laitu company te hi December thla chhunga thawk zo turin Sawrkar Laipui chuan na takin a nawr bawk a ni.