ZALEN September 30, 2026: Land Revenue & Settlement Department Minister B. Lalchhanzova chuan vawiin khan Zemabawk West Local Council House-ah, Zemabawk Middle School Veng House-site Plan huam chhunga ram neitu mi 96-te hnenah Ram lehkha/ Record of Rights (ROR) a hlan. He hun hi Bialtu MLA leh Cabinet Minister ni bawk Lalthansanga chuan a telpui.

LR&S Department Minister B. Lalchhanzova chuan, Zemabawk Middle School Veng House-site plan felfai taka peih a ni ta chu lawmawm a tih thu a sawi a. Tun hma lamin Risk Mual tih hiala lo hriat tawh ṭhin mah ni se, Veng chhung mipui leh khawtlang hruaitute bakah, Sawrkara thawktute inpekna leh helai ramin a kaihhnawih zawng zawngte ṭanrualna vanga tihfelfai theih a ni ta chu chhuanawm tak a ni tih a sawi. 

Ram neitu ten thlamuang taka mahni ram an luah theih tawh tur te, mahni hmun leh hma ṭheuh te a neitu nihna dik tak an chelh thei tawh turte chu ram neitute tan pawha hriat reng tawh tur a ni tih sawiin, mipuite harsatna chin felpui te, an lungngaihna te lo ngaihthlaksak leh an rawng bawlsak chu sawrkar ngaihpawimawh ber a ni a ti a. Kalkhawmte chu mahni hmunhma leh in leh lote chu theihtawp chhuaha enkawl zel tura fuihin, ṭhenawm ṭha tak nih tum zel tur leh khawtlang nuam siam kawngahte theitawp chhuah turin a chah bawk a ni.

Bialtu MLA, Cabinet Minister Lalthansanga pawhin kalkhawmte chu a lawmpui tak zet thu sawiin, sawrkar chuan mipuite buaina ching fel tur chuan theitawp a chhuah zel dawn tih a sawi a. An harsatna apiang chu ngampa taka thlen zel tura chahin, a theih chin chinah Bialtu a nihna ang pawha theihtawp chhuahpui zel a tum tih a sawi bawk a ni.