Aizawl: Central YMA Assistant Secretary Prof. Malsawmliana chuan, “YMA-in ‘Zirna uar’ kum a puanah hian mitinin kan thiamna neih ‘talent’ hi i tipung theuh ang u,” a ti.

Venghlui Branch YMA in Ningani kalta zana YMA kumpuan ‘Zirna uar’ hawnna Central hall, Venghlui a an neihah thu sawiin Prof. Malsawmliana chuan, “Mi tin hian talent chi hrang hrang kan nei vek a, ni tin kan eizawnna leh hnathawh bakah mi dang chhawr kher ngai lova heng kan talent te hi kan tihpun a ngai a ni,” a ti a. Zirna chuan mitin a huap tih sawiin, “Ni tin zir thar tur a awm reng a, tumah ralbang thei kan ni lo a ni,” tiin zir ringawt chuan awmzia a nei lo a ni tiin finna leh thiamna nei tura zir a pawimawh tih a sawi bawk.

YMA-in ‘Zirna uar’ kum a puan chhan sawiin sawrkar hna sangah Mizo lut an tlem avangin infuih thar a ngai a. Technical leh Medical-ah lut an tlem a, kan seat neih ang ang pawh kan hum/luah khat zo tawh lo a ni tiin, “Thiamna tak tak nei tur leh zirna rah tha nei turin kumpuan hi neih a lo ngai ta a. Pass ngawr ngawr tur ni lovin zirna quality tha zir tura tan kan lak a ngai a. Zirna kan kalpui dan hi a tha em tih kan ennawn a, a tha lo lai a awm chuan kawng dik in kawhhmuh a ngai a ni,” a ti bawk.

Venghlui Branch YMA hian YMA kumpuan hawnna hi a remchan dan angin an nei thin a. YMA kumpuan 'Zirna uar' pual hian class X leh XII te tan free tuition class an kalpui mek a ni.