ZALEN August 6, 2026: ZORO General Headquarter, Aizawl chuan International Day of the World Indigenous Peoples (Tualto Hnamte Ni) chu August 8, 2026 (Inrinni) hian hman a tum a, he hunah hian a tel duh apianga te tel turin an sawm a, tel ve thei lo te pawh mahni awmhmunah hnam thuam inbel theuh turin an ngen.

UN General Assembly-in International Day of the World Indigenous Peoples atana a pawm August 9 chu kumin-ah Pathianni anih avangin Inrinni hian an hmang dawn a, he huna rawn tel tur hian Manipur, Bangladesh, Myanmar, Assam leh Tripura-a zo hnathlak pawl hrang hrang bakah Mizorama an thawhpui NGO leh Political party te pawh an sawm.

Aizawl Press Club-a vawiina chanchinthar thehdarhtute an kawmnaah ZORO chuan he hun atan bik hian zo hnahthlak thuam hrang hrang an lakhawm te phochhuahna pawh an nei dawn tih an sawi a, Zo hnam thuam chi hrang 57 ngawt an lakhawm tawh thu an sawi. He huna tel tur te chu hnam thuam engemaw taka inbel tura ngen an ni. ZORO Vice President L. Ramdinliana Renthlei chuan, "Khua ten min bumro loh a, kan tum dan anga hun te kan hmang thei a nih chuan kan hmuhnawm khawp ang," a ti.

ZORO chuan Tualto Hnamte ni hi kum tin an hmang thin a, kuminah pawh hman an tum a. Zo hnam thuama inthuamin Chawhma Dar 11:00-ah Millenium Centre atanga Vanapa Hall thleng kawng zawh a ni ang a, Vanapa hall-ah hun hman chhunzawm a ni ang.