ZALEN, August 25, 2025: Zothan Autoworks chuan kum 10 tlin an lawm a, hetih chhung hian sumdawnna lirthei 7,019 an hralh.

Tata Motors commercial unit dealer, Zothan Autoworks hi August 25, 2015 khan hawngin September 9 atangin Mizoramah lirthei an hralh chhuak a; Thawhtanni khan Ajal Club Park-ah sawm bikte nen kum 10 tlin an lawm.

A tirah hnathawk mi 40 awmin tunah mi 115 an chhawr mek a, chawhrualin thla tin sumdawnna lirthei 58 chuang hret hralh ziah ang an ni a. February, 2021 kha thla khat chhunga lirthei an hralh tam ber niin Vahan-in a chhinchhiah danin 186 an hralh.

Managing Director Zothantluanga chuan Pathian hruaina avanga kum 10 tling thei an ni tiin lawmthu a sawi a, anmahni dawrtu leh puitute chungah lawmthu sawi bawkin an hnuaia hnathawktute thawh rimna leh inpekna vang a nih thu a sawi bawk.

Sale office, Bawngkawnah neiin Phunchawngah Service Station an kalpui a, Lunglei, Lawngtlai, Siaha, Champhai leh Kolasibah branch hawng tawhin Tata OK a hranin an nei tel bawk.

Lirthei an hralh tawh zingah Rs nuai 5.60 man, Ace Gold (petrol) a tlawm ber a, Rs nuai 70.45 chuang man Signa 4830 a to ber ve thung.

Anmahni dawrtute zinga mi vannei 10 thlang chhuakin August 25 atanga thla ruk chhungin vawi khat a thlawnin lirthei an siamsak dawn a, Rs 50,000 man thleng a huam ang.

General Manager Remruatfela chuan service lamah hna a hautak avangin sawiselna an tuar fo a, Tata Motors dan hnuaiah anmahni hralh chauh ni lovin Mizorama Tata commercial vehicle chhia a awm a nih chuan khawi hmunah pawh an siamsak a ngai a, an indaih tawk lo thin tih a sawi.

“Thla tin Mizorama contractor-te lirthei hman ringawt pawh 300 atanga 400 vel kan veng tel a, chutichungin theihawp kan chhuaha tun hnaiah hma kan sawn niin kan hria. Sawiselna kan dawngsawng thei reng a, inpan chilha hmaichhana intanpui theih a nih phei chuan kan inhawng reng a ni,” a ti.

Fela hian Zothan Autoworks-in Mizo thalaite dawm kan nan kawng hrang hrangah hma a la tel a, a bikin infiamna lamah a neitute an inhawng tih a sawi.

Kum 10 chhungin Mizorama sports event hriat hlawh - LPS Pro Fight-ah title sponsor vawi li (2016, 2019, 2022, 2023) leh Pro Volleyball-ah title sponsor vawi thum (2016, 2022, 2023) an ni tawh a ni.