ZALEN April 28, 2026 : ZPM chuan vawiin khan Aizawl Municipal Corporation General Election - 2026 Hnehna Lawmna, Vaivakawn Auditorium-ah ZPM General Headqurters President charge la mektu Lalduhoma chuan a kaihruai. 

Hun kaihruaitu Lalduhoma chuan, "Mipuite hnehna hi beiseina vang a ni, chu chu a tha zawk beiseina a ni. Mipui ten duh loh an nei a, duh an nei a, an duhthlanna chu vote hmangin an tilang ta a. Min enna tur leh min tehna tur pawh kan hnathawh danah a ni dawn, chuvangin, kan auhla leh kan manifesto anga hna thawh hi kan mission pawimawh ber a ni," a ti bawk. 

K. Sapdanga, UD&PA Minister chuan thu sawiin, "ZPM chu thawh rimna hmachhuantu kan ni. Kan candidate-te an thawk rim a, kan MLA te an tang em em bawk. Pathian malsawm tlakin kan thawk rim ve ni te hian ka hria a, thawhrimna kaltlanga Pathian leh mipuite malsawmna kan chan hi kan chapopui a thiang ve lo. Chuvangin, kan tawngkam te, kan thusawi te, kan thiltihah te kan fimkhur deuh deuh a ngai a ni." 

"Vawiin hi ZPM tan ni lawmawm a ni a, Aizawl khawpui tan ni chhinchhiah tlak a ni bawk. ZPM kaihhruai AMC lo piang thei ta hi a lawmawm a, min vote-tute min vote tlin chhan erawh kan hre reng tur a ni. ZPM Party naupang tak hian a din tirh atang khan kalphung thar a zuar a. Thil tha tih kan duhna te, siamthat duhna nena hma kan lakna te mipuiin min hriatsak a. Chu chuan zawi zawiin rah tha a chhuah mek a ni." 

"Kan Chief Minister hova reform kan siamte pawh hmuh theihin kan lo ti hlawhting tan chho mek zel ta a. Aizawl mipuite hian chu chu an hmuh hmaih lo a, seat 19 awma seat 17 hauh theia min lo thlang tling hi hna thawk chhunzawm tura min beisei vang a ni. Kan corporator zawng zawngte pawh ka chah nghal duh chu, ZPM chuan lalna leh thuneihna hi kan enjoy tur a ni lo a, hna thawh nan kan hmang tur a ni. Aizawl mipui hian sawrkar thlakna ngawr ngawr atan min thlang tling a ni lo ang, hna thawk thei turin min beisei a ni," tiin corporator tharte a fuih bawk.

Vice President C. Lalnunnema, chuan hunserh hmangin, "Tuna kan hlawhtlinna hi kan hotuten ram ro relnaah Pathian ram tundin thupuia an lo neih rah kha a ni tih hre reng ila, a ti hlawhtlingtu ni turin theihtawp i chhuah zel ang u," a ti a. Secretary General PB Lalsawmliana chuan report tawi pein, Corporator atana thlan tlinte lawmpuina leh thilpek hlanna neih a ni.