ZALEN April 8, 2026: Aizawl Mayor kalchhuak Lalrinenga Sailo chuan ZPM chu anmahni sawrkarna ngei LMC hnathawhna tur sum ti lapse vek duhtu, AMC sum hmuh tur pawh ti lapse luitu ZPM sawrkar hi Municipality enkawltir tlak an ni lo, a ti.

Lalrinenga Sailo chuan, "Khawpuia cheng mipuite tana AMC leh LMC ten hna an thawhna tur sum Finance Commission ruahman fel vek tawh cheng Nuai 3,400 chuang zet chu ZPM sawrkarin a ngaihthah vang liau liauin, central sawrkar kutah a let leh (lapsed) vek a, hetiang taka Municipality ngaihthahtu leh hrek bettu ZPM hi AMC enkawltir tlak an ni lo," a ti.

Aizawl Mayor hlui chuan, "ZPM sawrkar hian anmahni sawrkarna ngei, LMC-in Lunglei khawpuia cheng mipuite hmasawnna hna a thawhna tur, Finance Commission 15-na in a ruahmansak, kum 2024-25 chhung atan Rs. 9,23,12,000/- leh 2025-26 chhunga an hmuh tur Rs. 9,46,80,000/-, a belhkhawmin Rs. 18,69,92,000/- zet chu hmang thei lova siamin, heng sumte hi central sawrkarah a let (lapsed) vek a. LMC hian MNF sawrkar hunlai, 2023-24 chhunga an hmuh Rs. 6,35,44,000/- bak Finance Commission sum pek hi an la dawng ve reng reng lo a, ZPM sawrkar hnuaiah kum 2 chhung a zawnin an chȃn tawh a ni," a ti bawk.

AMC-in Finance Commission 15-na atanga a sum hmuh tur, AMC-a MNF sawrkarin lehkha pawimawh an chinfel vek pawh, ZPM sawrkar hian a tih ve tur, ‘Grant Transfer Certificate’ chu Ministry of Finance leh Ministry of Urban Affairs-ah te a huna a thawn loh avangin Rs. 15,26,60,000/- chu central sawrkarah a let (lapsed) bawk niin a sawi a, LMC leh AMC ten khawpuia cheng mipuite tana hmasawnna hna an thawhna tur sum ZPM sawrkarin a tih lapse belhkhawm hi Rs. 33,96,52,000/- a tling a ti a. Anmahni sawrkar siamna ngei LMC pawh ngaihthahtu leh AMC sum hmuh tur pawh Certificate pakhat lek thawn duh loh vanga ti lapse duhtu ZPM party hi khawpui enkawltir tlak an ni lo a. Mipuiten an hnawl a tul a ti. 

Municipality-a ZPM hlangin sawrkar an siamna, Lunglei Municipal Council (LMC) ngei pawh ZPM sawrkarin a enkawl dan atang hian AMC phei chu enkawltir chi an ni reng reng lo tih a chiang a. LMC hi hna thawk thei lovin an siam a, Central sawrkar thupek anga, Property Tax an lak tur pawh la mumal thei lovin an siam a, 2024-25 chhunga cheng nuai 79 vel an lak khawm ve pawh a hunah an khawn loh avangin a hunah Central sawrkarah an report hman lo a, Finance Commission sum ruahmansak pawh a zawnin kum 2 chhung an chȃn phah ta reng a ni. 

Lalrinenga Sailo chuan, "AMC-a MNF sawrkar liamta erawh kha chuan a tih tur engkim a ti fel a, lehkhapawimawh zawng zawngte pawh a tih fel vek avangin Finance Commission atanga sum lo kal pawh a dawng tha a, ZPM sawrkarin a huna AMC inthlanna a buatsaih loh avang leh AMC thuneihna zawng zawng March ni 1, 2026 atanga ZPM sawrkarin a laksak tak avangin 2025-26 bika Second Installment Rs. 15,26,60,000/- chu ZPM sawrkarin a tih lapsed sak ta tho a, Second Installment hmu tur pawh hian AMC chuan engkim a peihfel a, ZPM sawrkar zawkin ‘Grant Transfer Certificate’ chu Central sawrkarah a huna a thawn duh miau loh avangin Aizawl mipuiten hmasawnna hna thawhna tur sum tam tak kan chȃn phah ta a ni," a ti.

"Hetiang hi thil awmdan dik tak anih laia Chief Minister berin, “AMC tan sum tam tak kan nawr chhuak” tih te, “AMC-ten an ngawih bopui veng veng a, March 18 khan kan hrechhuak chauh a, MNF AMC-te khan Aizawl an lo vei lo hle a ni,” tih mipui hmaa a sawi duh maite hi chu thu dik hre reng chunga mipui bum tumna, koham taka AMC thuneihna an inpek thup tumna thil ṭha lo leh zahpuiawm tak a ni," a ti bawk.