ZALEN April 5, 2026: MNF thalai President Robert Romawia Royte chuan ZPM sawrkarin kum liam ta, 2025-2026 chhung ringawtin Special Assistance to States for Capital Invenstment (SASCI) Part-I hnuai bikah Mizoram chan sum Rs. Nuai 43,952 a ti-lapse tih a sawi.

Nimin khan Aizawl Press Club-ah thuthar thehdarhtute kawmin MNF thalai president chuan kum liam ta chhunga SASCI Part I sum sanction sa lapse zat chu Rs. Nuai 11,152 a ni tih sawiin, hemi bakah hian Mizoram tana ruahman fel sa diam, SASCI Part I additional Rs. Nuai 32,800 zet a bo hlen (lapsed) vek bawk niin a sawi.

Robert Romawia chuan SASCI rau rauah part -I sum chu DPR leh reforms siam pawh ngai lo, untied fund a ni tih sawi bawkin, hei leh zela vawi hnih nana ZPM sawrkarin sum tam tak a ti lapsed leh hi a serious tak zet a ni, a ti.

“Chief minister leh finance minister hian midang dem lovin mawh a la ngam tur a ni. Tuna Mizoram sawrkar officer leh staff te tho hi MNF hun laia SASCI enkawltute kha an ni a, MNF hun laiin cheng khat mah a lapse lo a, hei hi thuneitute mawh liau liau a ni. NE state dangten Part I hnuaiah an chanvo an tihchhuah theih vek laia ZPM sawrkarin a tichhuak ve thei lo hi official-te mawh ni loin, ZPM hotute mawh liau liau a ni,” a ti bawk.

Robert Romawia tar lan danin ZPM sawrkar chhung kum hnih leh tlem (thla 27) chhung lek hian sum sanction sa leh work order-te pawh contractor-te hnena pek tawh leh hna pawh thawh mawlh mawlh tawhna SASCI Part I hnuaiah vawi hnih sum tam tham tak, Rs. Nuai 34,483 a lapse a. Kum 2024-ah Rs. Nuai 23,331 a lapse a, kumin 2026-ah Rs. Nuai 11,152 a lapse leh a ni. ZPM sawrkar chhung hian SASCI Part I hnuai bikah chauh pawh Mizoram tana sum sanctioin sa, thla tin Rs. Nuai 1,277 lapse ziah ang a ni.