ZALEN September 22, 2026: ZPM thalai chuan Brigade Field siam ṭhatna tur atana ZPM Sawrkar hmalakna chungchangah inhnialna awm thei turin Opposition party ten RTI hmanga zawhna leh Assembly Session-a zawhna hmangin mipui rilru hruai kawi an tum tiin pawi an ti a, Brigade Field siam ṭhat nan a sum ruahman tawh Cheng nuai 500 chu Cheng nuai 600-a tihsan a ni an ti.

ZPM thalai chuan MNF Sawrkarin Brigade Field/AMC Playground sak nan Rs. 504 lakhs lo seng tawh mah se, inkhelhna tlak a ni lo a, a veng neitute rilru pawh a na hle a ni. Hei vang hian Chief Minister Lalduhoma chuan Brigade Field hi inkhelna tlaka siam leh turin ZPM sawrkar chuan Rs.500 lakhs a ruahhman thu a lo sawi tawh bawk a ni, an ti.

Brigade Field siam ṭhatna tura ZPM sawrkar hmalakna sawi nep tumin MNF Party chuan an theihtawp an chhuah a, tun Assembly Session hnuhnung berah pawh MNF MLA Lalrinsanga Ralte chuan Brigade Field siamna atana sum ruahman chungchangah zawhna hmun tur ni miahlo UD&PA ah zawhna zawtin, UD&PA Minister K Sapdanga'n a Department enkawl lai mek UD&PA-in Brigade Field sak ṭhatna tur ruahmanna an siam loh thu in a chhang a, zawhna tur hmun dik tak Sports & Youth Services emaw State Sport Council lamah he zawhna hi zawt se chhanna dik tak a hmu mai tura ngaih a ni.

June 2026 khan MNF Legal Board Vice Chairman Lalpianfela Chawngthu pawhin mipui rilru hruai kawi nan Finance Department ah RTI hmangin zawhna a lo zawt tawh a, kum tir lama FY 2026-2027 atana Assembly Budget Session neihah Finance Department-in Brigade Field siam ṭhat na tur Budget-ah passed a nih leh nih loh a zawt a, hetah hian Finance Department chuan Brigade Field siamna tur bik FY 2026-27-ah Passed nilo mah se, sum hnar remchang dang aṭanga an ruahmanna an siam tur thuin an lo chhang a ni.

Brigade Field hi inkhelhna tlaka siam turin ZPM Thalai General Headquarters chuan hma an la zel an ti a, Chief Minister Lalduhoma leh Sports Minister Lalnghinglova Hmar te pawhin an vei a, hei vang hian Sports & Youth Services Department chuan SASCI 2026-2027 Part I (untied) ah Rs. 600 Lakhs ruahmanna siamin Finance Department (Expenditure Control Branch) chuan Administrative Approval a pe tawh bawk a ni, an ti.

Brigade Field chungchangah hian eptu party ten ZPM Sawrkar hi dawt sawi tir min tum viau ṭhin mah se, Chief Minister Lalduhoma thawhrimna a zarah a taka tih hlawhtlinna lam kawng a zawh zel chu lawmawm an ti a, thalaite tana infiamna hmun rotling tak neih thuai an beisei an ti.