ZALEN August 12, 2025 : Aam Aadmi Party Mizoram te chuan Mizoram in sawrkar a hrawn tawh zawng zawng te'n vawiin thlenga tuialhthei dahkhawlna (oil depot) mumal an la siam lo chu mak an ti a, keini ang ram kilkhawr mamawh em em ngaih pawimawh a ni lo thin hi a thinrimthlak an ti. ZPM kaihhruai sawrkar hian chhuanlam siam lova a rang lama siam vat turin an ngen nghal bawk. 

AAP chuan, "Tuialhthei a kaihhlak hlek changa petrol pump zawng zawng te sawrkar in a khuahkhirh nghal vat thin hi mipui chanvo rahbehna dik tak niin kan hria a,he thilah pawh hian sawrkar hnuaia thuneitute in lak VIP na hi a khamawm kan ti takzet a, kalphungthar min tiamtu ZPM sawrkar hian hei hi chhu chat tawh se, essential service department mamawh bak zawng zawng chu mipui tana semzai thin tawh turin kan phut tlat a ni," an ti. 

Mizoram-ah The Petroleum Act,1934 leh The Petroleum Rules, 2002 kenkawh a ni lo hle in an hria a, mipui mimir tan a tuialhthei lei tur a awm loh laia man to zawk a lei tur a awm reng si hi mak an ti bawk.

Tun hnuah a chunga an sawi anga mipui mimir tan petrol/diesel an semzai thei dawn lo a nih rau rau chuan mipui te banphak awmchhun phalna nei lo a zuar ho zawng zawng te hi phalna pe vek tur in an phut bawk a ni.