ZALEN, September 02, 2025: April 17, 2025-a Aizawl DC-in Aizawl district chhunga Aadhaar operator mi 25-te tihtawpna thupek a chhuah chu dik lo taka tih a ni tih operator-ten an sawi.

Aizawl District Aadhaar Operator Association (ADAOA) chuan Thawhtanni khan thuchhuah siamin DC-in a tihtawp nana a tlawhchhan, October 14, 2022 leh January 12, 2023-a tihchhuah UIDAI OM (Office Memorandum) chu operator-te tihtawpna tur ni lovin Aadhaar Registrar (GAD Mizoram) leh Enrolment Agency (DC Aizawl) ten Aadhaar EA Migration an tih dan tur a ni zawk a nih thu an tar lang.

Mizorama district danga operator-te chu an DC-ten mipui mamawhna leh an dinhmun hriain an la thawk tih sawiin Aizawl DC hnuaia mite tihtawp bik chhan hi UIDAI thuchhuak bawhzuina ni lovin DC Office thuneitu, tute emaw mi mal inkara inhriatthiam lohna vang nia sawiin an rilru a na tak zet tih an sawi.

ADAOA chuan February thlaa ZPM chhung inkhawmah an thupuangtu, K.Laltluangkima’n, ‘Central sorkar hian Common Service Centre-ten Aadhaar Card an pe chhuak thin leh Aadhaar Card an renew thin hi dikhlel, felhlel a awm thei a ni tih hriain titawpa a pek chhuahna hmun atan DC Office chauh riruat tawh tur a ni tih thuchhuah central-in a nei,’ tia a sawi pawh thu dik lo a nih thu leh central sorkar atangin hetiang thu chhuah a awm loh thu an sawi.

DC atanga dik lo taka tihtawp an nih laia ram hruaitu, sorkar lai thupuangtuin thu dik lo a sawi chu na an tih thu leh YouTube-a a thusawi pawh tihreh nise, thu dik puansak turin an ngen tih an thuchhuahah hian an sawi bawk.

Operator thenkhatte tihtawp an nih chhanah raltlante dik lo taka Aadhaar lo siamsak thin nia sawi awm pawh thu dik lo a nih thu ADAOA chuan an sawi a, Aadhaar card nei tawhte chu a siamtu, siamna hmun, siam hun chhui vek theih a ni tih an sawi a, chhui an ngam tih an sawi.