ZALEN September 29, 2025 : ZPM chuan party office-ah vawiin khan chhung inkhawm an hmang a, thu sawitu PWD Minister Vanlalhlana chuan, “October 30, 2025 atangin Aizawl khawpui kawng siam that hna tan a ni dawn a, Aizawl leh Lunglei inkar kawng pawh hma kan la zui nghal ang,” a ti. 

Vanlalhlana, PWD Minister chuan, “Hun rei tak Aizawl khawpui kawng major repair ni tawh lo hi tha takin kan siam dawn a, tuna Bawngkawn kawng tha tak kan hmuh ang hian siam vek kan tum. October 30, 2025-ah hna tan a ni dawn a, Hot Plant hmun hnih PTC Lungverh leh Lengpuiah din a ni a, kawngpui pawimawh laia hman tur phei chu Silchar lung tha lak luh kan tum. Bituminous Concrete a ni a ni dawn a, Aizawl to Lunglei road pawh kan ngai pawimawh a, kan thawk chhumzawm ang,” a ti,

PWD Minister chuan, India ram leh Mizoramah kawng zawng zawng hi a enkawltu tur inthen sa vek a, lu tihaitu ber chu Vairengte atanga Sairang inkar kawng niin hei hi kan sawi tawh thin angin NHIDCL-in a enkawl a ni. Chutiang chu ni mah se, Kolasib leh Kawnpui inkar leh Khamrang leh Sairang inkar kawng te Mizoram sawrkarin contractor-te ruaia hna a thawh mek lai a ni a, NHIDCL-in heng kawng siam hna hi la mah se, a laklawh lai kawng siam hna kalpui reng tho a ni. Laih zawh a nih hnuah NHIDCL-in an enkawl zui ta mai si lo va, enkawltu nei lo ang main a awm hman ta a. Fur pui a lo thleng a, kawng a chhe chho zel a, harsatna kan tawk ta a ni a ti. 

Vanlalhlana chuan, “Harsatna mipuiten kan tawh takah chuan sawrkar kan che lo thei lo va, nikumah pawh harsatna lian tak kan pal tlang thei a, NHIDCL kuta awm a nih miau avangin a siam that hna pawh an thawh tur a ni. Chuti chung chung chuan Mizoram sawrkar chuan Finance Department-ah a siamna tur cheng vaibelchhe 9 kan dil a, kan dawng thei mai ta lo va, department sum ringawt hmang chuan he kawngpui hi enkawl sen a ni lo. Mahse, sawrkarin a ngai pawimawh em em a, kan Minister leh MLA-ten nitin inchhawkin an vil reng a, PWD lama thawktuten riah chilhin theih tawp tak an chhuah reng bawk a ni."

"Tun thleng hian kan ngaihsakin kan la buaipui reng a, chak lakna a buaithlak em em a, Mizoram-ah duh khawp hmuh tur a awm mang lo. Labour tur thlengin mamawh leh duh khawp hmuh tur an vang em em bawk a ni. Heng zawng zawngah hian mawhphurtu chu kan ni a; mahse, mawh kan phurh dan erawh ka sawi tak angin a zavai chuan a ni lo. Kawng tha siam turin khaw tha kan mamawh a, hei hi kan harsatna leh buaina lian ber niin thal hun kan thleng chho ang a, kan kawng te pawh a tha chho tawh turah ka ngai. Cheng nuai 137.87 kan seng ral tawh a, tunah hian cheng nuai100 kan dil belh leh mek a, Kawnpui leh Khamrang inkar leh Khamrang leh Sairang inkar kawng siam tha vek tur chuan Cheng nuai 500 kan mamawhin kan hria,” a ti bawk.