ZALEN August 30, 2025 : Aizawl Mayor Lalrinenga Sailo chuan vawiin khan Durtlang North Local Council hnuaia Local Health Sanitation Committee te ruahman a, an vengchhung a thianghlim zawk theihna tura khawlaia plastic bottle ruak paih tawh mipuite atanga leina hun a hmanpui a. Durtlang North Local Council House atangin plastic bottle leh sarang leh frooty/appy bur ruak motor trip 4 chuang leikhawm a ni.

Local Health Sanitation Sub Committee member ten tlawmngaia bottle ruak lei na tur an thawhkhawm hmanga bul tanin, Local Council sum nena tangkawpin Plastic bottle leina hun hi tum 2 (hnih) buatsaih a lo ni tawh a, Rs. 10,000/- chuang man bottle leikhawm a lo ni tawh a ni. Vawiin programme-ah hian chhun dar 12:00 thleng khan Rs. 10,000/- chuang man, motor trip 4 chuang leikhawm a ni tawh a ni a. Mipui ten, a bikin naupang te he hmalakna hi in an hlut hle a; Plastic bottle Liter 1 chunglam- Rs. 2/- zel in, Liter 1 or 1/2 - Rs. 1/-, Liter 1/2 hnuai - Rs. 0.50 (duli)/- in lei a ni a, sarang, appy/frooty bur ruak te kg ah ₹30/- in lei a ni bawk a ni. 

Mayor Lalrinenga Sailo chuan, Durtlang North Local Council in plastic bottle leikhawm nachang an hria chu ropui a tih thu a sawi a, heihi a tawpna tur a nih loh thu leh a bial chhung (Ward No. 1) a Local Council zawng zawng - Durtlang North bakah Durtlang, Durtlang Leitan, Leitan Ramthar, Zuangtui, Muanna Veng leh Selesih ah te kalpui vek a nih tur thu a sawi a ni. Local Council hmalakna hi AMC in theihtawpa a tanpui thin thu leh a tanpui zel tur thu a sawi bawk a ni.

Aizawl Mayor hian a bial chhung (Ward No. 1) a Local Council ten plastic an leikhawmna senso phuhrukna turin Rs. 10,000/- theuh a pe a, a phurhna tur Garbage Truck a ruahman sak bawk a ni.