ZALEN July 20, 2025: Aizawl Mihlun Thlah pawl hruaitute chuan Zirtawpni khan Aizawl Traffic Jam tih ziaawm dan tur sawipuiin Aizawl Traffic SP Ruatsanga Ralte chu a pisa-ah an hmu a, rawtna hrang hrang an neihte an thlen. 

An thu thlen zingah Zarkawt lam atanga Dawrpui Israel point rawn pan leh Zion Street atanga lo chho intawkkhawm hi tuna thunun danah chuan a chhawka tihdin thin a ni a. Hei hi khawi lam mah mah tiding chuang lova pakhat zela intlanchhawktir nise rei tak dinga innghak kher lovin muang tete-in an tawlh theiin an ring. 

Bazar lam atanga lo kal, Zodin Square-a kualtir thin chu traffic tibuaitu bul a ni fo tih an thlen bawk a. Hetah hian kual lovin Governor gate-ah chhuk thlain, Tennis Court-ah kualtir ni ta se. Khatla lam atanga lo kal nen chauh an intawk ang a, a ziaawm zawk an rin thu an thlen. 

Tuikual Kaisara road lam atanga lo chho hi lirthei a tam loh avangin ngaimawh tham ah an ngai lo va. Chhim lam atanga lo kal, Dawrpui Presbyterian Biak in bula kualtir thin hi Chanmari-ah kualtir vek ni se, Bara Bazar bawra traffic buai luai luai reng hi a tihziaawm theiin an ring tihte an thlen a ni.

Traffic SP chuan Aizawl Mihlun Thlahten Aizawl an veizia an tilang chu lawmawm a tih thu thu sawiin an lehkha thehluh chu ngun taka an lo zirchian tur thu a sawi.