ZALEN August 3, 2025: AMC Ward No. V Corporator Rosiamngheta chuan a ward chhunga chengte chiang zawka chhinchhiah an nih theihna tur Know Your Citizen (KYC) hmangin chhinchhiah hna a kalpui mek.

KYC chungchangah hian nimin khan Aizawl Press Club-ah chanchinbumite kawmin Corporator Rosiamngheta chuan khawvel ram hmasawn leh changkang apiangin data an ulukin an nei chikim thin tih a sawi a. “Data pawimawhna hi hriain Ward No. V Commitee chuan ngun taka a ngaihtuah hnuah kan ward chhunga hman turin Know Your Citizen tih software chu siamin hman a rem ti a. He software hi a la kimchang lo hle a, hmabak la awmte pawh kawng hrang hranga la tihhmasawn ngai a ni a, tunah rih hi chuan a bul tanna ang chauh a la ni dawn a ni,” a ti.

Rosiamngheta chuan, “He software-ah hian ward chhunga veng hrang hrang mipuite nihphung pawimawh zualpui chu dah luh tum a ni dawn a, hei hi local council-ten tul an tihnaah khua leh tuite mamawhnaah an hmang dawn a, vantlang luhchhuah nuai nuai thei a siam a phalrai tur erawh a ni lo a. He software hian thil pawimawh hrang hrang dah tum niin pem lehkha issue thlengin leh an pemna thlenga hriat zui theih tur dah tum a ni,” a ti. 

“Kan tunlai khawvel dinhmun en hian khawvel hi kan inkalpawhin kan inchiahpiah nasa tawh em em a, immigration chungchangte pawh ngaih pawimawh a hun tawh a, mi tha leh tha lote nen lama kan awm khawm tawh avangin data mumal kan neih a tul tawh vanga hetiang hi buatsaih kan ni,” a ti bawk.

Zawhna chhangin Corporator Rosiamngheta chuan KYC hi bultan chauh an la nih avangin a senso zat tur chiah an la sawi thei lo a, cheng nuai hnih vel chuan daih turah a ngai tih a sawi.

Ward No. 5 hian veng pathum - Zarkawt, Chanmari leh Electric veng te a huam a ni.