ZALEN November 2, 2025: Vawk natna chi khat, African Swine Fever (ASF) leng chu a ziawm tawh a. He hri vang hian kuminah vawk thi 9,622 awmin a hri kai nia rinhlelh vawk 3,584 suat a ni tawh bawk. nikum lama vawk thi te compensation pek tum an nih rualin kumina vawk thi erawh pek an ni dawn lo.

ZALEN-in AH & Vety department thawktute hnen atanga thu a dawn danin ASF leng hi October 18, 2025 atang khan a ziaawm chho a. Mahse, Thawhtanni kalta khan Ainawn vengah vawk pathum an thi leh a, hei bak hi chu tun hnaiah ASF vanga vawk thi leh suat an awm lo a ni.

ASF vanga vawk suatte zangnadawmna (compensation) chu pek tum a ni tih sawiin, “Vawk thi hrim hrim hnenah chuan zangnadawmna hi pek a ni dawn lo a, hri vei nia rinhlelh vanga vawk suat tuartute hnenah chauh pek a ni dawn a. Zangnadawmna hi vawk len dan a zirin an dawn/pek zat tur pawh a inang dawn lo a, vawk rih dan azirin a rate pawh a hrang dawn a ni,” an ti a. Zangnadawmna hi kum thar January velah sawrkar laipuiah dil an tum tih an sawi.

Nikum lamah khan ASF vanga vawk thi hi disaster-ah puan a ni a, kuminah erawh a ziawm deuh avangin state disaster-ah puan a ni lo a, hei vang hian zangnadawmna hi pek an ni dawn lo a ni. ASF vaccine hi Vietnam ramah chuan a awm tawh nia thudawn a ni.

AH & Vety department-a ran natna lam buaipuitute chuan, “Kum tin June, July leh August thla vel hi ASF hluar zual hun a niin hei hi natna kalphung ve hrim hrim a ni a. A tlangpuiin thlasikah hi chuan a ziaawm ve deuh thin a, hri kai leh thi an awm pawhin tlemte chauh an ni tlangpui thin a ni,” an ti. ASF kai hi Mizoram khaw 169-ah hmuh a ni.

Vety department thawktute chuan vawk natna chi khat, PRRS (Porcine Reproductive and Respiratory Syndrome) chu a vâng tawh hle niin an sawi a. Bawng/lawi/sial natna FMD (Foot-and-mouth disease) pawh kum 2023-a Kolasib district-a hmuh a nih bak chu hmuh nawn a la ni lo tih an sawi a. FMD vaccine hi kum khatah vawi hnih an pek thin vangin hri kai hi an awm lo nia an hriat thu an sawi bawk.