ZALEN August 25, 2025 : Assam Rifles ten Naga hel laka Purr post an hum champha pualin vawiin khan 'Purr Day' hman a ni a, he ni pual hian Assam Rifles chuan Zokhawsang-ah National Integrity & Educational Development Organisation (NEIDO) centre an hawng a, he Centre hming hi Mizopa hming chawiin 'Bevela Centre of Excellence' an phuah.

Major General Suresh Kumar Bhambhu, YSM, SM, IGAR (East) chuan NIEDO centre, BEVELA CENTRE OF EXCELLENCE hi a hawng a, hei hi 14th Assam Rifles atanga pension tawh Rifleman Bevela Lushai hming chawia phauh a ni. He hunah hian Rifleman (Late) Bevela Lushai’s fanu Vanlalnghaki Chhakchhuak leh an chhungte an tel a ni.

August 25, 1960 khan Nagaland-a Phek District-a hel silai keng mi 500 ten an bei a, AR te hi ralthuam leh thil dangah an chatlak tawh avangin Thawlhna hmangin Indian Air Force ten an mamawh te an thlak a, an mamawh an thlak zinga pakhat chu thlak sual palh niin he an thil thlak hi ral beihna hmanrua a nih avangin hel lam hi rawn la thei dinhmunah an ding a ni, Rifleman Bevela Lushai leh mi pahnih dang chuan an himna pawh ngaihtuah lovin an post chu chhuahsanin silaimu tam tham tak an post pawna thlak chu an va la a, beihna nasa tak an tawh lak atangin an him theih phah a, hel lakah Purr Post hi an hum theih phah ta a ni. 

Rifleman Bevela Lushai hi a huaisenna leh a inpekna avangin Ashoka Chakra hlan a ni.