ZALEN July 30, 2025 : Mizoram Pradesh Congress Committee (MPCC) Treasurer Dr. Lalmalsawma Nghaka chuan Sairanga Bamboo Technology Park chu a tlawh a, cheng tam tak senna chu a hman tlak loh tih a sawi.

Dr. Lalmalsawma Nghaka chuan, “Kan hriat theuh angin kan sawrkar hian May ni 14 ah khan Sairangah cheng nuai 252. 826 man Bamboo Technology Park a hawng a. He project ah hian mau atanga meihawl siam an tum bakah mau sawngbawl (seasoned) a kum 50 thleng dah that theiha siam an tum a ni,” a ti.

“Sawrkar Press Release a an ziah dan chuan he project hian nitin meihawl ton 3 a siam chhuak thei dawn a, kum khatah ton 9000 vel siam chhuah an tum a, mau pawh nitin pum 670 vel a mamawh anga chhut a ni. Chu chu ZPM research base a ni em ka hre lo a, DPR pawh kan nei lo. Mahse, sawrkar PR ah a inziah dan a ni. Research base a kal tura intiam ten he plant hi an hawn rualin an kalpui zawm thei lo nghal hi thil mak tak a ni,” a ti bawk.

A sawi zelnaah, “He meihawl siamna hmun sawrkarin a din hi a hmunah kan han tlawh a, an hawn lai vela hma an lak bak kha chhunzawm a awm ta miah lo a, an meihawl siam chhuah lah hi a hnip em em a, a sawm nghal vek zel avangin helai Sairanga thingpui dawr te pawhin hman tlakah an ngai lo a ni,” a ti.

“ZPM party hian an sawrkar hma khan an inzawrhna ber chu 'Research base in kan kal ang' tih a ni a, he an aupui research finding hi tun hi a hman hun tak a ni. He bamboo project, cheng vaibelchhe 2.52 man zet mai hi a lo thlawna hman loha awmtir ringawt hi research base an sawi thin nen a inhmeh lo hle,” tiin Dr. Lalmalsawma Nghaka chuan a sawi.

“Chief Minister in kumin May thlaa bamboo project hawnna a neihah khan a tawiawmtu Minister pakhat phei chuan mau sawngbawlna lamah Mizoramin bung thar a kai dawn ti hialin a sawi a nih kha. Bung thar kai ahnekin tunah khar (shut down) a ni der tawh a. Mipui sum nuai za tel teh meuh luan raltirin a awm hi vanduaithlak kan ti a ni,” a ti a.

“He project a sum an hman hi kan sawi tawh angin cheng vaibelche 2.52 lai a ni a, heng te hi Sairang to Kawnpui kawng chhe zual lai siam nan khan lo hmang se tuna kawng chhiat em vanga harsatna kan tawh zozai hi kan tawk lo tur! Thal chhung zawng kha Mizoram PWD enkawlna hnuaiah a awm a. Ruah tui hul lai January thla atang khan driver hoin kawng chhia an aupui tawh a, nawrh pawh an huaihawt chamchi a. Kan sawrkar hian fur kan hmachhawn dawn tih hre reng chungin a ngaihthah lui tlat a, kan tuar ta a nih hi,” a ti bawk.