ZALEN August 24, 2025: Mizoramah mi dang tana thih hnua mit (eye) pe tura intiam mi 9,231 an awm tawh a, corneal transplant tawh zawng zawng 593 an awm tawh bawk.

Civil Hospital, Aizawl (CHA) Eye Bank hotute hnen atanga ZALEN thudawn danin July 12, 2008-ah CHA, Eye bank hi Eye Bank Association of India-ah register niin July 31, 2008-ah hawn a ni.

September 25, 2009 khan CHA, Eye Department leh Sri Sankaradeva Nethralaya (SSN), Guwahati nena tangkawpin cornea transplant hmasa ber neih a ni a. Tun dinhmunah chuan mit pe tura in-register mi 9,231 an awm tawh.

Mitdel mit thlak ngai in-register mi 391 awm tawh bawkin, corneal transplant tawh zawng zawng 593 an awm tawh bawk (hei hian Mizorama transplant tawh zat bakah SSN, Guwahati-a transplant an tih, Mizoram atanga cornea an thawn thlak hmang pawh a huam).

Tun dinhmunah mit lak tawh zawng zawng 1,328 awm tawhin mit pe tawh zat tun dinhmunah mi 672 an awm tawh bawk.

Eye bank hotute sawi danin India-ah kum tin mit darthlalang chhia thlak ngai mi 25,000 atanga 30,000 awm anga chhut a ni a, eye bank hi India ramah an inthlunzawm vek avangin cornea hi state dang nen in-supply tawn vek a ni.

Mizoram pawh eye donation a tihthat avangin central hriat pawh a hlawh a, India state 28 zinga a titha state 15 zingah a lang.

Mit transplant hi thlak nawn lehte a ngaih thin avangin mit donate tur hi mamawhna a sang lo thei lo.

Mit pe turin kum bithliah awm loin mit lama harsatna nei tan pawh mit darthlalang a chhiat loh chuan pek theih a nih thu te, mi dangte tana thih hnua mit pe duh tan inziah luh theih a nih thu leh hriatpuitu erawh an awm a ngaih thu te an sawi.

“Thi hnua mit pek hian mitmu zawng zawng la chhuak loin mit darthlalang chauh lak chhuah a nih avangin mihring hmel a tidanglam lo a, mitthi chhungte tan pawh hmuh nuam lo engmah a awm lo,” tiin an sawi.