ZALEN September 16, 2025 : Indian Public Health Standards norms-in a phut ang chuan district hospital-te chuan damlo in-admit tan general medicine, general surgery, maternity, paediatric, new born, isolation case, critical care, post-operative, ante-natal, post-natal te an neih vek tur a nih laiin Comptroller & Auditor General of India (CAG) report 2023-in a tar lan dan chuan Mizorama district hospital-ten an neih tur ang an nei pha lo hlawm.

He report-a a lan dan chuan 2021-22 chhung khan district hospital - Siaha, Lawngtlai, Kolasib, Mamit leh Saitual-ah te ENT case avanga admit pakhatmah an awm lo a, mit (eye) avangin district hospital - Lawngtlai, Serchhip, Saitual leh Hnahthial-ah te admit an awm lo bawk.

Ortho-ah hian Champhai, Siaha, Lawngtlai, Mamit, Saitual leh Hnahthial-ah admit an awm lo bawk.

CAG report-in a tar lan dan hian dental-ah bik Champhai district-a mi 16 an admit bak district dang hospital-ah admit an awm lo.

Psychiatric ward-ah Lunglei-ah mi 40 admit an awm a, district dang zawngah an awm lo va. SNCU-ah Serchhip, Kolasib, Mamit, Khawzawl, Saitual leh Hnahthial-ah te dah luh an awm lo a, ICU-ah dah luh hi district hospital - Aizawl leh Champhai tih lovah chuan an awm lo.

2021-22 IPD Paediatric service hi Saitual district tih loh state chhunga district hospital-ah te chuan a awm vek a, ICU hi Aizawlah leh Champhaiah chiah a awm thung.

Kolasib district chuan orthopaedic ward an nei lo chungin orthopaedic damlo an enkawl a. Khawzawlinhian obstetrcis & gynaecology ward nei lo chungin hetiang natna nei hi enkawl an nei bawk.

CAG chuan district hospital-te hi hetiang dinhmuna an din chhan chiang tak hrih an nih an beisei laiin, Mizoram health department chuan February, 2024 khan, “IPHS norms-in a phut ang specialist neih hi district hospital tinah an nei pha lo tih zawng an hrilh a ni,” an ti.