ZALEN Feb 17, 2026: 2026: Vawiin khan Chief Minister Lalduhoma chuan Lengte kai Tlawng lei, Meter 100 a sei, Meter 7.5 a zau, a sir tawna mihring kalna tur Meter 1.5 a zau footpath nei, Metric ton 385 chawi zo thei, Ministry of Road Transport & Highway sum Rs. Vbc. 43.83 senga dawh, Faith Bridge tia a hming vuah chu a hawng. Vanlalhlana, PWD Minister chu khualzahawm a ni.

A hawnna inkhawmah thusawiin Chief Minister chuan, kum 2024 December thlatir lamah khan a lei chhuat hi Crane hmanga hnuh kai tuma a ni a, a khaina hrui pakhat a chat a, an hlawhchham ta a. Hun eng emaw chen an han inbuatsaih leh a, April ni 7, 2025 ah hnuhkai an han tum leh a. Contractor-ten Kristian puithiamin hlan hmasa se an ti a, Lengpui Pastor Rev. Lalchungnunga Hauhnarin a hlan a. harsatna tawk lovin, awlsam takin an hnuk kai ta a. A hminga Faith Bridge han phuah pawh hi a inhmeh viau a ni.

Census 2011 ah khan Mamit district-ah khaw 90 vel a awm a, mipui 85,000 chuang an cheng a. Agriculture lamah potential a nei tha a, Kuhva tharchhuak tam district an ni. Chief Minister Rubber Missions kan kalpui mekah pawh hma kan lak nasatna district a ni. Tripura leh Bangladesh nena kan inkalpawhna kawngpui a ni a, Langkaih Balu, kan rama Balu tha ber nia mi tam takin an ngaih kan lakna kawngpui a ni. Tin, Mizoramin Airport kan neih chhun Lengpui Airport panna kawngpui a ni a. NIT Mizoram Campus pawh Lengpuiah hian a awm a. Mamit – Bairabi kawngpui hi kan chak lakluhna kawng pawimawh a ni chho zel a. A la tangkai tial tial dawn a. Hengte vang ringawt pawh hian he Lei hi a pawimawh a, kan ram hmel lannna a ni bawk a ni.

Awlsamna tam tak min thlen dawn a, kan ram economy chawikanna kawngah a tangkai hle ang. A siamna tur sum min petu MoRTH chungah te, a thawktu PWD chungah te, Design Consultant M/s Force Structural Engineering Pvt Ltd., Navi Mumbai chungah te, Proof Consultant IIT Bombay chungah te, Safety Consultant M/s Engineering Project Consultants, Thane chungah te leh Contractor Poddar Infra Tech chungah te lawmthu kan sawi a ni, a ti.

Chief Minister thusawi dangte chu:

1. Lei pawimawh tak ni mah se kum tam tak chhung chu Bailey Bridge dawhkai a ni a. Bailey Bridge te hi an load lak theih a hniam a. Load restriction-te siam a ngai a. Lengtekai lei pawh hi tum thum, 2006, 2014 leh 2015 ahte khan a chim a ni.

Vawiinah lei chak tawk tak kan lo dawhkai ta a. Load restriction avanga unload ngai thin ang chi kha chu a awm tawh lo tura ngaih a ni.

2. He Lei dawh nan hian Ministry of Road Transport & Highway (MORTH) chuan pawisa a rawn sanction a, kum 2021 March ni 27 khan a thawktu turte ruat an ni a, agreement ang chuan kum 2023 March ni 27-a thawk zo tura tih a ni. Kan sorkar veleh kan umzui nghal a. Kan zo mai dawna kan inhriat laiin kan sawi tak ang khan a pawhkaina hrui chat vangin an han khawtlai leh ta a. April ni 7, 2025 khan pawh kai a ni a, September ni 10, 2025 khan hna zawng zawng an zo fel a, vawiinah kan lo hawng thei ta a ni.

3. Sorkarna kan chelh tirh phat atanga kan sawi fo chu, "A huna hna thawh zawh" thu hi a ni. A hun taka, quality tha taka hna thawk zo thin sorkar nih hi kan tum a.

Kum 20 zet rambuai kan tawrh avangin Infrastructure lamah India ram state dangte kan phak lo nasa a, kan road density te hi a hniam bik a. Tuna kan road density hi 46.37 Km per 100 Sq Km chauh a la ni a, India ram average chu 116 Km per 100 Sq Km a ni.

4. Central sorkar hi kan lakah an inhawng hle a, a bik takin Minister of Road Transport & Highways Pu Nitin Gadkari hian Mizoram min duhsak a. A chungah pawh kan lawm a. Kan mamawh ka zuk sawi apiang mai hi min la tihhlawhtlinsak deuh vek a ni.

Hetianga central lama kan hruaituten inhawng taka min ngaihthlak lai hian chak taka hnathawh kan duh a, duhsaktlak a kan thawh that a tul a ni.

5. Tunah hian Aizawl khawchhung kawngpuite hi kan PWD Minister kaihhruaina hnuaiah an siam mek a. Mipui lam atangin tlan a nawm thu kan ngaithla mawlh mawlh mai. Khaw chhung kawng siamna tur hi kan pek belh zel a. Hman ni lawk khan district capital zawng zawng an thawhna tur pawisa kan pe leh a ni, tihte an ni.

Technical report hi Er. H. Zoramliana, E-in-C, PWD chuan a pe a:-

He Lei dawh nan hian Ministry of Road Transport & Highway (MORTH)-in Rs. Vbc. 42.44 a sanction a. Load Capacity hi 385 MT a ni a, contractor hi Poddar Infra Tech niin design consultant hi M/s Force Structural Engineering Pvt Ltd, Navi Mumbai an ni a, Proof Consultant hi IIT Bombay an ni a, safety consultant hi M/s Engineering Project Consultants, Thane an ni. A lei chhuat pawh kai tak rih zawng kha 430 MT a ni a, khawvela hrui hmanga lei thir hnuh kai rit ber zinga mi nia sawi a ni.

Bridge dawh chhûng zawng hian hna thawhna hmanrua leh hna thawhte quality test reng a ni a. Bridge dawhna bulah site laboratory dah a ni a. PWD atangin Laboratory Assistant leh Contractor lam atangin Laboratory Assistant ten test chi hrang hrang an kalpui zel a. Rawra leh balu hi Silchar atanga lak luh hman a ni a. Cement OPC 43 leh OPC 53 te hman a ni a. Rawra a chan that leh chan that loh te, concrete chak zawng te etc test thin a ni.

Bridge structure hi Rourkela-ah siam a ni a, a part hrang hranga phurh thlen niin zawmkhawm chawp a ni. Bridge hangers atan hian Thailand rama a bik taka siam Carbon Steel tension rods hman a ni. Lei dawh zawh a nih hnuah load Test neih a ni a. Test result a tha a, lirthei eng chi pawh a tlan thei a ni.

#ZalenNews