ZALEN September 15, 2025 : Vawiin khan ZPM chuan Party office-ah chhung inkhawm kan hmang a, thusawitu Adviser to Chief Minister TBC Lalvenchhunga chuan, “He ram siamtha tura kan thupui chu mipui tana inhlan leh rorelna tha zawk a ni a, opposition kan nih laia ram kan hmangaih ang khan tunah pawh kan la hmangaih zel tur a ni. Kan au hla a danglam tur a ni lo va, kalphung hlui zia kan chhawm tur a ni lo va, kan sawrkar tak avangin kan sawi huai ngam lo tur a ni hek lo. Hei hi ka politics a ni,” a ti. 

Centrally Sponsored Scheme (CSS) hnuaia thawk te chungchang sawiin TBC-a chuan, “CSS hnathawk kan dah ngheh theih loh chhan chu danin a remtih loh vang a ni. Dan hi kan zah tur a ni a, dik taka ro kan rel theih nan kan huai ngam tur a ni. ‘Sawrkar turin kum tam tak kan lo vakvai ve tawh’ tituten hlawkna kan um a nih chuan, he ram hmasawnna tur leh kan vahvaih chhante kha kan kalsan dawn tihna a ni. Sawrkar ve tak avangin contract hna kan beisei ngawt tur a ni lo." 

"Contract-a eizawng duh chu Contractor-ah inziak lut rawh se. Sawrkar kal tawhte atangin contract hna zawh loh 200 chuang leh K. Deposit-ah cheng vaibelchhe 1500 chuang kan chhawm. Sorkarin sum a neih lohzia kan hria a, hall sak leh field phaha contract hna thawh hi he ram damna tur leh hmasawnna tur a ni lem lo. In MLA theuhte hnenah, ‘Engtin nge MLA Fund i hman?’ i ti ngam em? MLA Fund Rs. 200 lakh hi hmasawnna hnathawh nan a tam khawp mai," a ti.

Mipuite dinhmun sawiin, "MLA leh Minister-te zim luai luai hi hman ata tawh Mizo mipuite chin than a ni a, hengte hi vawiinah chuan kan bansan a hun tawh a ni. A tawp berah chuan FCAA chungchang a ni emaw, thil dang dangah pawh kan hruaitute thu sawi awih i zir ang u, an dik tawk lohna pawh kan sawisel ngam tur a ni. He ram tana kan chan tawhna chu kan chan tawh ni se, he ram tan a dang pawh i chan ngam leh ang u,” tiin fuihna thu a sawi bawk a ni.